Epress.am Լուրեր Հայաստանից
Ադրբեջանում գործող Ղարաբաղի ազատագրման կազմակերպությունը հայտարարություն է տարածել, որտեղ դեմ է դուրս եկել երգիչներ Ֆիլիպ Կիրկորովի և Իրինա Ալեգրովայի` Բաքու կատարելիք այցին:
Հայտարարության մեջ նշվում է, որ Ֆիլիպ Կիրկորովի հայրը` «Բեդրոս Կիրկորյանը» ամեն տարի «հայերի ցեղասպանությանը նվիրված համերգներով է հանդես գալիս տարբեր երկրներում»:
«Նա, միաժամանակ, հանդիսանում է «Դաշնակցություն» կուսակցության անդամ: Ֆիլիպ Կիրկորովի քեռին` Քըրք Կիրկորովը, ապրում է ԱՄՆ-ում և շատ ապահովված մարդ է (հավանաբար, նկատի ունեն միլիարդեր Քըրք Քըրքորյանին, ում պատկանում է «Լինսի» հիմնադրամը: Բուլղարհայ Բեդրոս Կիրկորովի հետ նրա ազգակցական կապերի մասին երբեք ոչինչ չի խոսվել – Epress.am): Նա մշտապես մեծ ֆինանսական աջակցություն է ցուցաբերում Հայաստանին:
Ֆիլիպ Կիրկորովը համերգներից մեկի ժամանակ հայտարարել էր, որ հպարտանում է իր հայկական արմատներով:
Իրինա Ալեգրովան նույնպես ծագումով հայ երգչուհի է: Նա շատ հաճախ «օկուպանտ երկիր Հայաստանի» քարոզչությամբ է զբաղվում: Երգչուհին ձայնասկավառակ է թողարկել` «Հայաստան, ես կվերադառնամ քեզ մոտ» վերնագրով, իսկ 2009 թվականին մասնակցել է հայկական երաժշտական փառատոնի, որն անցկացվել է Լոս Անջելեսում: Այդ փառատոնի ընթացքում նրան «լավագույն հայ երգչուհու» մրցանակ է շնորհվել»,- ասված է Ղարաբաղի ազատագրման կազմակերպության հայտարարության մեջ: