Epress.am Լուրեր Հայաստանից
Քաղաքական դաշտի միաբևեռացման, իշխանությանը հակակշռող ընդդիմության բացակայության պայմաններում Ղարաբաղի ներքին իրավիճակը չի կարելի կայուն համարել: Newcaucasus.com-ի հետ զրույցում նման կարծիք է հայտնել Լեռնային Ղարաբաղի արտաքին քաղաքականության և անվտանգության գծով հասարակական խորհրդի ղեկավար, ԼՂՀ նախագահի նախկին թեկնածու Մասիս Մայիլյանը:
Նրա խոսքով` Արցախում ժողովրդավարության մակարդակի որոշակի նվազում է նկատվում: «Սակայն ես համաձայն չեմ այն մտքի հետ, որ «քաղաքական իրավունքի» և «քաղաքացիական ազատությունների» պահպանման հարցում ԼՂՀ-ն արդեն հավասարվել է Ադրբեջանին` «անազատ» պետության կարգավիճակ ձեռք բերելով»,-հավելել է Մայիլյանը:
«Ժողովրդավարության զարգացումը ԼՂՀ-ի համար երկու կարևոր գործառույթ ունի: Նախ` ԼՂՀ-ի ժողովրդին հարմար կլիներ ապրել այնպիսի երկրում, որտեղ պաշտպանվում են մարդու իրավունքները և գործում են օրենքները: Երկրորդը` ԼՂՀ-ի համար ժողովրդավարությունը արտաքին քաղաքականության կարևոր գործառույթ ունի: Զարգացած ժողովրդավարական երկրները, ելնելով սեփական արժեքային համակարգից, հասկանում են, որ ժողովրդավարության առումով ավելի զարգացած հասարակությունը չի կարող կառավարվել մեկ այլ երկրի բռնապետական ռեժիմի կողմից: Հետխորհրդային տարածաշրջանի երկրների մեծ մասում ժողովրդավարական արժեքներից հեռացում է նկատվում: ԼՂՀ-ի միջազգային ճանաչմանը հասնելու համար, իշխանությունը, քաղաքական կուսակցությունները և հասարակությունը պետք է Լեռնային Ղարաբաղի Հանրապետությունը հետ պահեն այդ վտանգավոր միտումներից»,- հայտարարել է Մայիլյանը:
Խոսելով Ղարաբաղում Հայ Ազգային Կոնգրեսի գաղափարների տարածման միտման մասին` Մայիլյանն ասել է, «Հայաստանի քաղաքական կուսակցություններից ԼՂՀ-ում ներկայացված է միայն «Դաշնակցությունը», որը մտնում է ղարաբաղյան իշխանամետ կուսակցությունների բլոկի մեջ: 2007 թվականի մայիսից ԼՂՀ-ում կազմակերպված ընդդիմադիր ուժ չկա, թեև ընդդիմադիր տրամադրություններ նկատվում են»:
Իսկ հարցին` արդյոք հնարավոր է նախկին նախագահ Արկադի Ղուկասյանի վերադարձը ԼՂՀ, Մայիլյանը պատասխանել է, «Շատ բան կախված կլինի նախկին նախագահի քաղաքական կամքից և երևանյան ղեկավարության աջակցությունից»: