Home / Հայաստան / Արտակարգ դրության մասին նոր օրենքի նախագիծը հակասահմանադրական չէ. վարչապետ

Արտակարգ դրության մասին նոր օրենքի նախագիծը հակասահմանադրական չէ. վարչապետ

ՀՀ արդարադատության նախարար Հրայր Թովմասյանի ներկայացրած «Արտակարգ դրության իրավական ռեժիմի մասին» օրենքի նախագիծն ինքը հակասահմանադրական չի համարում: Այս մասին ՀՀ վարչապետ Տիգրան Սարգսյանն ասել է այսօր Ազգային ժողովում` պատասխանելով լրագրողի հարցին:

Նա նշել է, որ Կառավարությունն օրենքի վրա բավական երկար ժամանակ աշխատել է միջազգային փորձագետների  հետ:

«Այսօր արդարադատության նախարարը ներկայացրեց,  թե ինչ քննարկումներ են եղել, ինչպիսի դիտողություններ, առաջարկություններ են եղել, որպեսզի օրենքը  շտկվի, ինչպես նաև հաշվի առնվի նախորդ տարիների ձեռք բերված փորձը: Ցանկալի է, որ մինչև ընտրություններ շտկվի օրենքը և հաշվի առնվեն նաև այն հարցերը, որոնք մտահոգել են մեր հանրությանը, մեր մասնագետներին: Եվ եթե ակնհայտ էր, որ կան թերություններ, որոնց վրա մատնանշում էին ինչպես մեր քաղաքացիները, այնպես էլ միջազգային փորձագետները, ցանկալի է մինչև ընտրություններ շտկել այդ թերությունները, որպեսզի ավելի վստահ, ավելի լավ օրենքով անցկացնենք լավ ընտրություններ», – ասել է վարչապետը:

Համաձայն օրենքի նախագծի,  արտակարգ դրությունների ժամանակ Զինված ուժերը կարող են միջամտել իրավապահ մարմինների գործողություններին, եթե ծագած խնդիրները հնարավոր չէ ապահովել Ոստիկանության և Ազգային անվտանգության մարմինների միջոցով:

Լուսանկարը` yerkirmedia.am