ՀՀ կառավարությունը հրաժարական ներկայացրեց. ԲՀԿ-ականներին շնորհակալություն հայտնեցին

Այսօր ՀՀ կառավարության նիստի մեկնարկին ՀՀ վարչապետ Տիգրան Սարգսյանը ընթերցել է Սահմանադրության 55-րդ հոդվածի պահանջը, որը վերաբերում է Հայաստանի Հանրապետության կառավարությանը։

«Հիմք ընդունելով Հայաստանի Հանրապետության Սահմանադրության 55-րդ հոդվածի 4-րդ կետը և հաշվի առնելով, որ 2012 թ. մայիսի 31-ին գումարվել է Հայաստանի Հանրապետության նորընտիր Ազգային ժողովի առաջին նիստը, ես Հանրապետության Նախագահին եմ ներկայացրել կառավարության հրաժարականը: Միևնույն ժամանակ մենք ձեզ հետ միասին պարտավոր ենք շարունակել կատարել մեր պարտականությունները մինչև նոր կառավարության կազմավորումը», – ասել է Տիգրան Սարգսյանը։

Ինչպես հայտնում է ՀՀ կառավարության կայքը, նիստի ավարտին ՀՀ քաղաքաշինության նախարար, ԲՀԿ անդամ Վարդան Վարդանյանը, հաշվի առնելով, որ կառավարությունն արդեն հրաժարական է տվել և «Բարգավաճ Հայաստան» կուսակցությունն էլ քաղաքական որոշում է կայացրել, շնորհակալություն է հայտնել բոլոր գործընկերներին հինգ տարվա համատեղ աշխատանքի համար, բոլորին հաջողություն և առողջություն մաղթել։

Վարչապետ Տիգրան Սարգսյանն ի պատասխան ասել է. «Ես էլ ցանկանում եմ շնորհակալություն հայտնել «Բարգավաճ Հայաստան» կուսակցության գործընկերներին, ովքեր մեզ հետ այս տարիների ընթացքում կառավարության ծանր լուծը տարել են իրենց ուսերի վրա։ Շնորհակալություն»։