Home / Հայաստան / Ֆրանսիայում պատմության դասագրքերը Հայոց ցեղասպանության մասին գլուխ կունենան

Ֆրանսիայում պատմության դասագրքերը Հայոց ցեղասպանության մասին գլուխ կունենան

Ֆրանսիայի նախագահ Ֆրանսուա Օլանդի վարչակազմը 1915 թվականին տեղի ունեցած հայերի ջարդերի մասին պատմական իրադարձությունները ընդգրկել է միջնակարգ դպրոցի դասագրքերում: Մտավախություններ կան, որ այս քայլը կարող է կրկին սրել Ֆրանսիայի և Թուրքիայի հարաբերությունները, թեև Թուրքիան հույս ուներ բարելավել դրանք նոր նախագահի պաշտոնավարման ընթացքում, գրում է թուրքական Today’s Zaman պարբերականը:

Կիրակի թուրքական Sabah-ը հաղորդել էր, որ Ֆրանսիայի ԱԳ նախարարը որոշել է Հայոց Ցեղասպանության մասին գլուխներն ընդգրկել պատմության և աշխարհագրության դասագրքերում:

20-րդ դարի համաշխարհային պատմությունն ուսումնասիրող աշակերտներն այսուհետ կուսումնասիրեն նաև «Հայոց Ցեղասպանություն» կոչվող գլուխը:

Նշենք, որ մեկ ամիս առաջ Ֆրանսիայի նախագահ Ֆրանսուա Օլանդը, ինչպես իր նախորդը, հայտարարել էր, որ աջակցելու է Հայոց Ցեղասպանության ժխտումը քրեականացնող օրենքի ընդունման համար իրականացվող գործողություններին:

Հիշեցնենք, որ Թուրքիայի և Ֆրանսիայի հարաբերությունները սրվեցին այն բանից հետո, երբ Ֆրանսիայի Սենատը օրինագիծ ընդունեց, որը պատիժ էր նախատեսում Հայոց Ցեղասպանությունը ժխտողների համար: Երկրի Սահմանադրական խորհուրդը ավելի ուշ չեղյալ էր հայտարարել տվյալ օրինագիծը: