Օսկանյանն ասել է՝ ինչու օտարերկրացիները Հայաստանում ներդրումներ չեն անում

2012 թվականի առաջին կեսին նախորդ տարվա նույն ժամանակահատվածի համեմատ օտարերկրյա ուղղակի ներդրումները նվազել են 40 տոկոսով, իսկ երկրորդ եռամսյակի կտրվածքով այդ անկումը կազմել է 60 տոկոս: ԲՀԿ-ական պատգամավոր Վարդան Օսկանյանը Facebook սոցիալական ցանցում գրել է, որ այդ ցուցանիշը շատ մտահոգիչ է, քանի որ Հայաստանում տնտեսության զարգացումը հնարավոր չէ առանց այդ ներդրումների:

Օսկանյանի խոսքով՝ ներդրումներ չանելն ունի տնտեսական պատճառներ՝ երկրի մակրոտնտեսական անբարենպաստ ցուցանիշներ, ազատ շուկայական հարաբերությունների հիմնարար սկզբունքների բացակայություն, և տնտեսությունից դուրս գործոններ՝ հույս ապագայի նկատմամբ, անորոշություն, արդարություն, խաղաղություն ու կայունություն:

«Ապագայի նկատմամբ հույսի ներշնչումը պետք է գա առաջին հերթին իշխանության գլուխ կանգնածներից՝ նրանց խոսքով և գործով: Պետք է գա նաև քաղաքական համակարգից, որը պետք է ունենա հակակշիռների անհրաժեշտ մեխանիզմը և երկրի զարգացման ու հեռանկարների և այլընտրանքների շուրջ անկաշկանդ ու առողջ բանավեճը:

Դա այսօր իսպառ բացակայում է: Որոշակիությունը և տնտեսությունից ներդրողի ու սպառողի ակնկալիքները տնտեսության խթանման ամենակարևոր գործոնն են: Այդ առումով և՛ օրենսդրական դաշտը, և՛ ակնկալիքները խիստ մշուշոտ են: Միայն հարկային և մաքսային օրենսդրությունը վերջին մի քանի տարիների ընթացքում անընդհատ փոփոխվում է, և խոսակցությունները հետագա փոփոխությունների մասին երբեք չեն դադարում: Ներդրումներին լրջորեն խանգարում է նաև դրամի փոխարժեքի անորոշ վարքագիծը: Արդարություն. ցանկացած ներդրող այսօր լուրջ մտահոգություն ունի, որ ինչ-որ խնդիր ունենալու դեպքում, հատկապես եթե դա ինչ-որ մեկի հետ է, որն ունի քաղաքական լծակներ, չի կարող վստահ լինել արդարադատության հարցում: Այստեղ լուրջ մտահոգություն կա նաև խտրական արդարադատության առումով, երբ առանց իրավական հիմնավորումների պետական մարմիններն օգտագործվում են ինչ-որ խնդիրներ լուծելու համար:  Խաղաղություն և կայունություն. այս հարցը բնականաբար բոլորի մտքում կա: Այսօր ավելի, քան երբևէ սա ներդրումների համար լուրջ խոչընդոտ է: Ադրբեջանը անվերապահորեն զինվում է, խստացրել է ռազմական հռետորաբանությունը, շփման գծում զինադադարի խախտման դեպքերը հաճախակիացել են, իսկ բանակցային գործընթացը մտել է լուրջ փակուղի», – պարզաբանել է Վարդան Օսկանյանը: