ԱԺ-ում մերժվեց «Ժառանգության» օրինագիծը

Այսօր ՀՀ Ազգային Ժողովի «Պետական-իրավական հարցերի մշտական հանձնաժողովի» նիստի օրակարգում քննարկվեց «Ժառանգություն»  խմբակցության կողմից ներկայացված «Հայաստանի Հանրապետության ընտրական օրենսգրքում լրացումներ եւ փոփոխություն կատարելու մասին» օրենքի նախագիծը:

Համաձայն նախագծի, «Հայաստանի Հանրապետության համապետական ընտրությունների ժամանակ (Հայաստանի Հանրապետության Նախագահի և Հայաստանի Հանրապետության Ազգային Ժողովի)` քվեարկության օրը, Հայաստանի Հանրապետության տարածքից դուրս գտնող  ՀՀ քաղաքացիները կունենան հնարավորություն իրացնել իրենց պատկանող ընտրական  իրավունքը»:

Ինչպես հաղորդում է «Ժառանգության» կայքը, նախագծի քննարկման ընթացքում հիմնական զեկույցով հանդես է եկել «Ժառանգություն»   խմբակցության պատգամավոր  Զարուհի Փոստանջյանը, ով նշել է, որ Հայաստանի Հանրապետության սահմաններից դուրս գտնվող Հայաստանի Հանրապետության քաղաքացիները Հայաստանի Հանրապետության սահմաններում բնակվող  Հայաստանի Հանրապետության քաղաքացիների հետ հավասար ունեն և պետք է ունենան ընտրելու՝  օրենքով ամրագրված հնարավորություն, որի իրականացման մեխանիզմները պետք է սահմանված լինեն ՀՀ օրենսդրությամբ, իսկ դրանց գործնական իրականացումը պետք է ապահովվի Հայաստանի Հանրապետության պետական մարմինների գործունեությամբ:

«Սակայն իշխող կոալիցիայի ներկայացուցիչները ՀՀ քաղաքացու սահմանադրական հիմնարար իրավունքի կոպիտ խախտումը չցանկացան վերացնել:

Աշխարհում ապրում է շուրջ տասը միլիոն հայություն, որոնցից  մոտ երեք միլիոնը, լինելով Հայաստանի Հանրապետության քաղաքացի,  բնակվում է Հայաստանի Հանրապետությունում, իսկ  օտար երկրներում բնակվող Հայաստանի Հանրապետության քաղաքացիների թիվը կազմում է շուրջ մեկ միլիոն, վերջիններս փաստացի զրկված են մասնակցելու Հայաստանի Հանրապետության կառավարմանը:  Այսօր ևս մեկ անգամ ՀՀ Ազգային Ժողովը վկայեց, որ Հայաստանի Հանրապետությունում իշխանությունը լիարժեք չի պատկանում մեր  ժողովրդին:

Տեղի ունեցած քվեարկությամբ նախագիծը չստացավ հանձնաժողովի դրական եզրակացությունը: «Դեմ» քվեարկեցին Լևոն Մարտիրոսյանը (ՀՀԿ), Կարեն Ճշմարիտյանը (ՀՀԿ), Դավիթ Հարությունյանը (ՀՀԿ) և Հովհաննես Մարգարյանը (ՕԵԿ), և «կողմ»՝ Զարուհի Փոստանջյանը (Ժառանգություն), Գագիկ Ջհանգիրյանը (ՀԱԿ), Արծվիկ Մինասյանը (ՀՅԴ): Տիգրան Ուրիխանյանը (ԲՀԿ) և Էդմոն Մարուքյանը (անկախ) բացակայում էին», – նշված է «Ժառանգության» հաղորդագրության մեջ: