«Թյուրըմբռնում». երևանյան ակումբը պնդում է՝ այցելուին հրեա լինելու համար չէ որ դուրս են հանել

Bourbon St. ժամանցային ակումբից այցելուներից մեկին դուրս են հրավիրել ոչ թե ազգությամբ հրեա  լինելու համար, այլ զուտ այն պատճառով, որ նա իրեն անպարկեշտ է պահել: Այս մասին նշված է Bourbon St. ակումբի տնօրինության հայտարարության մեջ, որը տեղադրվել է ակումբի Facebook-ի էջում:

Երեկ Epress.am-ը միջադեպի մասին կարծիքներ էր ներկայացրել՝ դիմելով նաև ակումբին՝ տեսակետ արտահայտելու խնդրանքով: Ակումբից ասել էին, որ հարցերը կարելի է ուղղել Facebook-յան էջի միջոցով, ինչն էլ արվել էր: Հոդվածը հրապարակելու պահին ակումբը հայտարարությամբ դեռևս հանդես չէր եկել:

Երեկ ուշ երեկոյան տեղադրված հայտարարության մեջ ակումբի տնօրինությունը նշում է, որ «իրականում վեճը բռնվել և զարգացել է լեզվաբանական թյուրըմբռնումումից»: Վեճի բնույթի մասին այլ մանրամասներ չեն հաղորդվում:

«Միջադեպից հետո ակումբի տնօրինությունը պատրաստակամություն է հայտնել այսօր (դեկտեմբերի 10-ին-խմբ.) հանդիպել միջադեպի անմիջական մասնակիցների հետ, սակայն վերջիններս վերջին պահին զանգահարել և անհայտ պատճառով հրաժարվել են հանդիպումից:

Bourbon St. ժամանցային ակումբը, համաձայն ՀՀ օրենսդրության, բոլոր այցելուների և անդամների համար, անկախ ազգային ծագումից, ռասայից, լեզվից, սեռից, կրոնից, աշխարհայացքից մշակել և կիրառում է նույն կանոնները:

Այդ կանոնները մշակված են այն նպատակով, որպեսզի ապահովվեն բոլոր հաճախորդների անվտանգությունը և հանգիստ ժամանցը:

Նաև տեղեկացնենք, որ Bourbon St. ակումբը ունի տասը աշխատակից, որոնցից մի քանիսը այլ ազգի են, այդ թվում՝ հրեա, ուստի մեղադրել ակումբի աշխատակիցներին «ռասիսզմի» մեջ ուղղակի անմտություն է», – նշված է ակումբի հայտարարության մեջ:

Լուսանկարը՝ Bourbon St.-ի Facebook-ի էջից