Home / Հայաստան / Նախագահի թեկնածուն գիտի՝ ինչպես նվազեցնել «Սերժ Սարգսյանի ձայները»

Նախագահի թեկնածուն գիտի՝ ինչպես նվազեցնել «Սերժ Սարգսյանի ձայները»

Չկա Սերժի Հայաստան, չկա Րաֆֆիի  Հայաստան, կա Հայաստան, որտեղ ընտրությունների միջոցով ժողովուրդը իշխանություն ձևավորելու հնարավորությունից զրկված է, և այս առումով թե նախագահն է, ըստ էության, նշանակված, թե խորհրդարանական ուժերն են, ըստ էության, գործարքով խորհրդարան մտել, որովհետև չի եղել ընտրություն, որի արդյունքների հետ բոլորը համաձայնեն: Այս մասին այսօր լրագրողների հետ հանդիպմանն ասել է քաղաքական գործիչ, դիվանագետ, ԼՂՀ արտաքին գործերի նախկին նախարար, ՀՀ նախագահի թեկնածու Արման Մելիքյանը:

«Այսօր մենք հասել ենք վերջնագծին, երբ գործող իշխանությունը պոտենցիալ քաղաքական մրցակից կուսակցություններին, ըստ էության, շանս չթողեց ընտրությունների միջոցով արդյունք գրանցել: Դրա հիմնական տուժողը հասարակությունն է, ու եթե այսօր հասարակությունն իրեն պաշտպանելու միջոցներ չձեռնարկի, մենք կունենանք մենաշնորհով, շատ մշուշոտ տխուր ապագայով պետություն», – ասել է նախագահի թեկնածուն:

Նրա խոսքով՝ իր թիմը հրաժարվում է իշխանություններին որևէ բան ապացուցելու սովորույթից, ինչը սովորաբար արվել է իրենց ներկայացուցչին սատարող քաղաքական ուժերի կողմից, ովքեր փորձել են ապացուցել, որ հենց իրենց ներկայացուցիչն է հաղթել ընտրություններում:

«Մեր խնդիրն է, որպեսզի ընտրությունները լինեն իրավաչափ: Մենք սկսելու ենք ընտրությունների իրավաչափությունները որոշել մինչև ընտրությունները», – ասել է Մելիքյանը:

Ըստ բանախոսի՝ ընտրությունների բոյկոտն ի սկզբանե կանխատեսելի էր՝ գործող իշխանության հիմնական մրցակից համարվող քաղաքական ուժերը հրաժավեցին պայքարից:

«Ասպարեզում հայտնվեցին այն մարդիկ, որոնց կարող են գնահատել Հայաստանի քաղաքական դաշտի երկրորդ էշելոնի ներայացուցիչներ: Ես նկատի ունեմ կուսակցապետերի. այժմ առաջադրվել են երեք քաղաքական ուժերի առաջնորդներ՝ «ԱԻՄ», «Ժառանգություն» և պարոն Հրանտ Բագրատյանը, ով նույնպես կուսակցապետ է: Ըստ էության, ստեղծվել է մի իրավիճակ, երբ առաջադրվողներից որևէ մեկը առայժմ, համենայնդեպս, չառաջարկեց ընտրություններում հաղթելու իրական որևէ սցենար, իսկ մենք պատրաստել ենք այդ սցենարը», – ասել է Մելիքյանը:

Նրա խոսքով՝ այսօր շատ կարևոր է ճշտել, թե Հայաստանում ձայնի իրավունք ունեցող քանի մարդ է մնացել:

«Կճշտենք, որքանով են պաշտոնական  տվյալեները լինելու ճշմարտացի: Եթե հրաժարվեն հրապարակել նման տվյալներ, մենք պարզապես կիջեցնենք նրանց  ռեյտինգը. այսինքն՝  մենք համարում ենք, որ  35-ից 40 տոկոս ընտրողներ Հայաստանում չեն ու  այդ պատճառով չեն մասնակցելու ընտրություններին: Այդ թիվը մենք կնվազեցնենք իրենց գրանցած տվյալներից: 1 միլիոն մարդ կգրանցեն ի օգուտ Սերժ Սարգսյանի, ուրեմն 40 տոկոսը դրանից կիջնի: Եթե մենք հավաստի տեղեկություններ ստանանք, որ զինվորներին  պարտադրում են քվեարկել հօգուտ գլխավոր հրամանատարի, ուրեմն 100 հազար մարդու քվե մենք կհանենք Սերժ Սարգսյանի ձայներից», – նշել է քաղաքական գործիչը:

Նա նաև ավելացրել է, որ վերը նշվածները իրենց մարտավարության որոշ դրվագներն են միայն, իսկ դրույթների ամբողջական տեքստը կհրապարակվի շաբաթվա վերջում: