«Հայտարարված է պերեխվատ ծրագիր». բերման է ենթարկվել Կոլյա Ղուկասյանը

Այս պահին Արգավանդի խճուղուց դեպի «Զվարթնոց» օդանավակայան տանող ճանապարհին ավտոմատավոր ոստիկաններ են կանգնած: Еpress.am-ը Ոստիկանության լրատվության և հասարակայնության հետ կապերի վարչության աշխատակից Արմեն Մալխասյանից հետաքրքրվել է` արդյոք ավտոմատավոր ոստիկանների առկայությունը կապված է Գյումրիում  տեղի ունեցած կրակոցների հետ:

«Հայտարարված է պերեխվատ ծրագիր», – ասել է Մալխասյանը:

Հիշեցնենք, որ այսօր Գյումրու Շիրակացի փողոցում կրակել են ԲՀԿ-ական Մարտուն Գրիգորյանի քավոր Հարություն Խաչատրյանի (Քավոր Հարութ) և Արտյոմ Կարապետյանի (Շեկո) վրա:

Ավելի ուշ՝  հրազենային վնասվածքով Գյումրու բժշկական կենտրոնի վերակենդամնացման բաժանմունք  տեղափոխված  Արտյոմ Կարապետյանը մահացել է:

Ըստ շրջանառվող վարկածի՝ ԱԺ պատգամավոր Մարտուն Գրիգորյանի այս երկու թիմակիցների հետ հարաբերություններ պարզող խումբը գլխավորել է Գյումրու նախկին քաղաքապետ Վարդան Ղուկասյանի մահացած եղբոր որդին:

Ոստիկանության լրատվական ծառայության հաղորդմամբ՝ Շիրակի մարզի քննչական բաժնում հարուցվել է քրեական գործ:

Ձեռնարկած միջոցառումների արդյունքում՝ հանցագործություն կատարելու կասկածանքով, Բագրատաշենի սահմանային անցակետից ոստիկանության Գյումրիի բաժին բերման է ենթարկվել Կոլյա Ղուկասյանը: Նախաքննությունը շարունակվում է:

Դեպքի վերաբերյալ որոշ մանրամասներ է ներկայացրել Aravot.am-ը: Ըստ կայքի՝ հարձակում է եղել «Քավոր Հարութի» տան վրա, տանը եղել են մայրը, կինը և դուստրը: Այն պահին, երբ «Քավոր Հարութը» «Շեկոյի» հետ փորձել է մտնել տուն, հենց շեմի վրա հնչել են կրակոցները: Ըստ շրջակայքի բնակիչների՝ հարձակումը եղել է երկու փուլով. նախ կրակել են ատրճանակներով, հետո հեռացել են: Վերադարձել են ու կրակել արդեն ավտոմատներով:

Հարություն Խաչատրյանի վիճակն այս պահին ծանր է: Մահացած Արտյոմ Կարապետյանն ուներ 2 անչափահաս երեխա:

Տեսանյութը՝ «Շիրակ կենտրոնի»