Օմբուդսմենն ակնկալում է, որ ՀՔԾ-ն կքննի Անի Գևորգյանի նկատմամբ բռնություն կիրառելու փաստը

Օմբուդսմեն Կարեն Անդրեասյանը լրջորեն անհանգստացած է «Չորրորդ իշխանություն» թերթի թղթակից Անի Գևորգյանի հետ երեկ տեղի ունեցած միջադեպով: Այս մասին ասված է ՄԻ պաշտպանի տարածած հայտարարության մեջ։

Նշենք, որ Անի Գևորգյանին երեկ ոստիկանության բաժնում ապտակել է քաղաքացիական հագուստով մի անձ։

«Լրագրողի մասնագիտական գործունեությանը խոչընդոտելը, առավել ևս՝ նրա նկատմամբ բռնությունը, քրեորեն պատժելի են և խիստ դատապարտելի, հատկապես, եթե այդ հանցագործությունները կատարվել են պետական պաշտոնյաների կողմից:

Նման հանցագործությունները կանխարգելելու միակ եղանակը իրավապահ մարմինների օպերատիվ, խիստ և համաչափ արձագանքն է։

Առաջնորդվելով բոլոր անձանց անմեղության կանխավարկածով՝ միաժամանակ զերծ ենք մնում առավել հստակ գնահատականներից և ակնկալում ՀՀ հատուկ քննչական ծառայության պատշաճ և բազմակողմանի քննությունը, ինչպես նաև դրա արդյունքների վերաբերյալ հանրությանը սեղմ ժամկետներում իրազեկումը»․ – ասված է Կարեն Անդրեասյանի հայտարարության մեջ: