Բարսելոնան քառորդ եզրափակիչում է․ Մեսսին ռեկորդ է սահմանում

Մարտի 12-ին կայացած Չեմպիոնների Լիգայի ևս երկու հանդիպումներում անակնկալներ չգրանցվեցին։ Ֆրանսիական «Պարի Սեն-Ժերմենը», որն առաջին խաղում մրցակցի դաշտում 4։0 հաղթել էր Լևերկուզենի «Բայերին», սեփական հարկի տակ ավելի գթասիրտ գտնվեց՝ պարտության մատնելով գերմանական թիմին 2։1 հաշվով։

«Բարսելոնա»-«Մանչեսթեր Սիթի» հակամարտությունում նույն հաշիվը գրանցվեց ի օգուտ կատալոնյան ակումբի, բայց հակամարտությունն ավելի սուր ստացվեց։

Չնայած առաջին խաղակեսում «Բարսան» առավելություն ուներ, բայց «Սիթին» չէր մտածում միայն պաշտպանության մասին և փորձում էր հակագրոհել։ Անգլիական թիմն անգամ մեկ շատ վտանգավոր պահ ստեղծեց, սակայն Սամիր Նասրին հարվածեց դարպասապահի վրա։ Երկրորդ խաղակեսում մոտ 15 րոպե հյուրերն անգամ առավելություն ունեցան, սակայն չօգտագորշեցին իրենց պահերը, իսկ Լիոնել Մեսսին, ով հիանալի հանդիպում անցկացրեց, օգտվեց Ջոլեոն Լեսկոտի սխալից և բացեց հանդիպման հաշիվը։ Դա Մեսսիի Չեմպիոնների Լիգայում խփած 67-րդ գնդակն էր։ Ռեկորդակիրը՝ Ռաուլը, 71 գոլի հեղինակ է դարձել, սակայն Մեսսին իր բոլորը գոլերը խփել է 1 թիմի կազմում և այդ ցուցանիշով լավագույնն է Չեմպիոնների Լիգայի պատմության մեջ։

Հանդիպման վերջում թիմերը մեկական գնդակ փոխանակեցին. «Սիթիից» աչքի ընկավ Վենսան Կոմպանին, իսկ «Բարսելոնայից»՝ Դանի Ալվեսը։

Հաջորդ շաբաթ պարզ կդառնան Չեմպիոնների Լիգայի քառորդ եզրափակիչ փուլի մասնակից ևս 4 թիմեր՝ «Մանչեսթեր Յունայթեդը» կմրցի «Օլիմպիակոսի», Դորտմունդի «Բորուսիան»՝ «Զենիթի», «Չելսին»՝ «Գալաթասարայի», իսկ «Ռեալը»՝ «Շալկեի» հետ։