Epress.am Լուրեր Հայաստանից
Այսօր մոտ մեկ տասնյակ քաղաքացիներ բողոքի ակցիա են անցկացրել ԱՄՆ դեսպանատան մոտ՝ պահանջելով աչք չփակել Քեսաբում տեղի ունեցող իրադարձությունների վրա և դատապարտել Թուրքիայի՝ որպես ՆԱՏՕ-ի անդամի գործողությունները Սիրիայում: Ակցիայի մասնակիցները նշել են, որ եկել են դեսպանատուն՝ իրենց մտահոգությունը հայտնելու Քեսաբում հայ բնակչության տեղահանությունների վերաբերյալ, որոնց մասնակցել են ԱՄՆ ռազմավարական գործընկեր Թուրքիայի ռազմական ուժերը։
«Հաշվի առնելով, որ Թուրքիան ԱՄՆ-ի ռազմավարական դաշնակիցն է, մենք պահանջում ենք, որ ԱՄՆ՝ որպես ժողովրդավարության ջատագով, հանդես գա ի պաշտպանություն քաղաքացիների, ում իրավունքները երկար ժամանակ խախտվում են։ Մենք ուզում ենք, որ ՄԱԿ-ի Անվտանգության խորհուրդը քննարկի քեսաբցիների ու ընդհանրապես քրիստոնյաների հարցը Սիրիայում», – հայտարարել է ակցիայի մասնակցներից մեկը։
Նշենք, որ ակցիայի մասնակիցների մոտ է դուրս եկել ԱՄՆ փոխդեսպան Կլարկ Փրայսը, ով լսել է ակցիայի մասնակիցների պահանջը, ապա զրուցել ակցիային մասնակցող երկու քեսաբահայ երիտասարդներին։
Նա խոստացել է քեսաբահայերի մտավախությունները ներկայացնել ԱՄՆ դեսպանին։