Ծեծկռտուք՝ «Փակ շուկայի» դիմաց․ Ոստիկանները պնդում են՝ ահազանգ չեն ստացել․ «ՀԺ»

Ապրիլի 6-ին, ժամը 16:00-ի սահմաններում, ըստ ականատեսների, վիճաբանություն ու ծեծկռտուք է տեղի ունեցել Մաշտոցի պողոտայում գտնվող «Փակ Շուկայի» դիմաց, գրում է «Հայկական ժամանակ» օրաթերթը:

Թերթը նշում է, որ վիճաբանությունը սկսել է ներսում, իսկ շուկայի դիմաց դարձել է ծեծկռտուք։

«Ըստ ականատեսների, տուժողները եղել են սիրիահայեր։ Վիճաբանությանը միջամտել են մի խումբ ոստիկաններ, և դեպքին մասնակցած մի շարք անձինք բերման են ենթարկվել։

Ոստիկանության հետ կապերի և լրատվության վարչությունից, սակայն, հայտնեցին, թե նշված վայրից և նշված ժամի սահմաններում ոստիկանությունը որևէ ահազանգ չի ստացել։

Ամբողջ խնդիրն այն է, որ քաշքշոցը տեղի է ունեցել «Փակ շուկայի» մուտքի մոտ տեղադրված տեսախցիկների նկարահանման դաշտում։ Ու քանի որ ենթադրվում է, որ միջադեպին մասնակից են եղել «Փակ շուկայի» աշխատակիցները, կարելի է նաև ենթադրել, որ «տեխնիկական պատճառներով» տվյալ ժամին նկարահանած կադրերը ջնջված կլինեն»,–նշում է թերթը։

Մանրամասները՝ թերթի այսօրվա համարում