Հայաստանի իշխանություններին կոչ են անում բարձրացնել ասորիների ոչնչացման հարցը

Միջազգային հանրությունը որևէ իրական քայլ չի ձեռնարկում ոչնչացման եզրին գտնվող ասորիների փրկության ուղղությամբ։ Մերձավոր Արևելքում ասորիների վիճակի թեմայով հունվարի 18֊ին Երևանում կայացած մամուլի ասուլիսի ժամանակ նման հայտարարություն է արել ՀՀ ԳԱԱ պատմության ինստիտուտի ավագ գիտաշխատող Անահիտ Խոսրոևան։

Ասուլիսի մեկ այլ մասնակից, «Աթուռ» ասորական ասոցիացիայի նախագահ Արսեն Միխայլովն, իր հերթին, Հայաստանի իշխանությունների կոչ է արել ասորիների ցեղասպանության հարցը բարձրացնել միջազգային մակարդակով՝ նրանց ամբողջական ոչնչացումը կանխելու համար։

Խոսրոևայի խոսքով՝ Սիրիայի 35 ասորաբնակ գյուղերից վտարվել է շուրջ 100 հազար մարդ, որոնցից 500֊ը գերի է վերցվել։ 130 ասորի, հավելել է գիտաշխատողը, մինչ օրս գտնվում է «Իսլամական պետության» զինյալների ձեռքում, իսկ գերիների մի մասին հրապարակային մահապատժի են ենթարկել․ «Իրաքում էլ վիճակը նույնն է. Ասորիներն այնտեղ ապրում են տարրական հարմարություններից զուրկ եկեղեցիներում, փախստականների ճամբարներում»։

Խոսրոևան ուշադրություն է հրավիրել իրավիճակի վերաբերյալ Ամերիկայի Միացյալ Նահանգների «զարմանալիորեն տարբերակված» քաղաքականությանը, որը չի ճանաչում քրիստոնյա ասորիների ցեղասպանությունը, մինչդեռ ճանաչում է եզդիներինը։

«Անցյալ տարվա ընթացքում 100 000 մահմեդականներ, որոնք չեն հալածվում իրենց երկրի իշխանությունների կողմից, ստացել են վիզա ԱՄՆ մտնելու համար, բայց քրիստոնյաներին չի թույլատրվում այդ երկիր մտնել»,֊ ասել է բանախոսը։

Մերձավոր Արևելքում ասորիների կյանքը բարդացնող մեկ այլ գործոն Խոսրոևան անվանել է տեղի քրդական բնակչությանը, որը ձգտում է ստեղծել «Սիրիայի և Իրաքի Քրդստան»։ Գիտաշխատողը նշել է, որ տվյալ հանգամանքի հետևանքով շատացել են բախումները ասորիների ու քրդերի միջև, որոնք փորձում են առաջիններին դուրս մղել իրենց բնակվայրից։

Ասուլիսի մասնակիցները կոչ են արել քուրդ և ասորի ժողովուրդներին դադարեցնել պայքարը միմյանց միջև ու ուժերը միացնել ընդհանուր թշնամու՝ ԻԼԻՊ֊ի դեմ։