Դատարանը Սեֆիլյանին չի թույլատրել մասնակցել նիստին, կամ նյութերին ծանոթանալ գրավոր

Վերաքննիչ քաղաքացիական դատարանը այսօր հրաժարվել է հնարավորություն տալ ընդդիմադիր գործիչ, քաղբանտարկյալ Ժիրայր Սեֆիլյանին մասնակցելու իր գործով դատական նիստին։

Վերաքննիչը նաև մերժել է Սեֆիլյանի պաշտպան Տիգրան Հայրապետյանի երկրորդ միջնորդությունը՝  տրամադրել պատասխանող Արմենիա հեռուստաընկերության գրավոր դիրքորոշման պատճենը, որպեսզի դրան հայցվոր կողմն էլ ծանոթանա։  Նշենք, որ Սեֆիլյանն այս գործով բողոքում է ընդդեմ Արմենիա հեռուստաընկերության, որը, ըստ Սեֆիլյանի, զրպարտություն և վիրավորանք է հեռարձակել իր մասին՝ նպատակ ունենալով  վնասել իր  պատվին, արժանապատվությանը և բարի համբավը։

2016 թվականի հունիսի 12-ին՝ Ժիրայր Սեֆիլյանի ձերբակալությունից մեկ շաբաթ առաջ, «Արմենիա» հեռուստաընկերության «Սուր անկյուն» հաղորդաշարի  ընթացքում ասվել էր, թե ղարաբաղյան պատերազմի ժամանակ Ժիրայր Սեֆիլյանը վիրավոր զինվորին թողել է մարտի դաշտում։

Վերաքննիչի դատավորներ Հարություն Ենոքյանի, Ստեփան Միքայելյանի և Արթուր Սմբատյանի  երկու մերժման որոշումները  անաչառության կասկածներ են հարուցել , և Սեֆիլյանի պաշտպան Տիգրան Հայրապետյանը բացարկ է հայտնել նրանց։

Այս գործով Սեֆիլյանի դեմ  վճիռ է կայացրել առաջին ատյանի դատարանը։ Աջափնյակ և Դավթաշեն վարչական շրջանների ընդհանուր իրավասության դատարանի դատավոր Նաիրա Ավետիսյանը պաշտպանել էր «Սուր անկյան» ռեպորտաժը՝  հայտարարելով,  որ «լրատվության ազատությունը ներառում է նաև որոշակի աստիճանի չափազանցված կամ հրահրող խոսք», իսկ «արտահայտվելու ազատության իրավունքը պաշտպանում է նաև այնպիսի արտահայտությունները, որոնք կարող են ցնցող, վիրավորական կամ վրդովեցուցիչ համարվել ոմանց կողմից»։