Հունան Պողոսյան․ Պատժել հասարակությունում վխտող ճիճուներին, ոջիլներին, վիժվածքներին

Փողոցային տարբեր խաղաղ ակցիաների մասնակիցների հանդեպ բռնություն կիրառող գործողությունների հրամանատար, փոխոստիկանապետ Հունան Պողոսյանին Սյունիքի մարզպետ նշանակելու կապակցությամբ վարչապետ Նիկոլ Փաշինյանը նշել է «քաղաքական ռասիզմի» անթույլատրելիության մասին։ Դրան արձագանքել է «Հելսինկյան ասոցիացիա» կազմակերպության ղեկավար, իրավապաշտպան Նինա Կարապետյանցը, ով Ֆեյսբուքի իր էջում հիշեցնում է 2018-ի հունվարին իրավապաշտպանական կազմակերպության անունից հրապարակած բաց նամակը ՀՀ Նախագահ Սերժ Սարգսյանին։

«2018 թվականի հունվարի 10-ին Հայաստանի Հանրապետության կառավա­րու­թյանն առընթեր Հայաստանի ոստիկանության պետի առաջին տեղակալ, ՀՀ ոստիկանության խորհրդակցական մարմնի (Կոլեգիայի) անդամ Հունան Պողոսյանը Ազատություն ռադիոկայանին տված հարցազրույցի ժամանակ հայտնել է՝ «Հասարակությունում վխտող բոլոր ճիճուներին, ոջիլներին միշտ պատժել է ոստիկանությունը և շարունակում է պատժել ու շարունակելու է» և «միշտ ոստիկանությունը կոնկրետ էս վիժվածքներին պատժել է»: Հունան Պողոսյանին պաշտոնի նշանակել եք Դուք՝ Ձեր հրամանագրով:

Թեև անչափ կարևոր է, թե ում է ուղղված նրա այդ արտահայտությունները, այդուհանդերձ ցանկանում ենք հասկանալ՝ Դուք նրան պաշտոնի նշանակե՞լ եք այդ դատապարտելի բառապաշարի, թե՞ ոստիկանական գործառույթներ իրականացնելու համար: Ինչ վերաբերում է այդ խոսքերի հասցեատիրոջը կամ հասցեատերերին, ապա որևէ անձ, առավել ևս բարձր պաշտոնատար անձ, իրավունք չունի անձանց մասին նման արտահայտություններ թույլ տալ:

Սույն դեպքում անմեղության կանխավարկածի կամ սահմանադրությամբ երաշխավորված այլ իրավունքների մասին խոսելն ուղղակի ավելորդ է: Պետական բարձրաստիճան պաշտոնյան իր վարքով ու աշխատանքով պարտավոր է օրինակ ծառայել իր ենթականերին ու հանրությանը. դա՞ է Հ. Պողոսյանի օրինակն իր ենթակա ոստիկանության աշխատակիցների կամ հանրության համար: Պահանջում ենք ապահովել Նախագահի հրամանագրի սահմանադրական ինստիտուտի նկատմամբ հարգանքը և քննարկել Հունան Պողոսյանի հետագա պաշտոնավարման հարցը», – ասված էր բաց նամակում: