Home / Առողջապահություն / Եվս 2 հաստատված դեպք Ղարաբաղում․ երկու գյուղ ինքնամեկուսացված է

Եվս 2 հաստատված դեպք Ղարաբաղում․ երկու գյուղ ինքնամեկուսացված է

Ղարաբաղում այսօր գրանցվել է կորոնավիրուսով վարակվածության ևս 2 դեպք․ թեստավորված 3 քաղաքացիներից 2-ի թեստի արդյունքները եղել են դրական։ Վարակվածների ընդհանուր թիվը, ըստ պաշտոնական տվյալների, հասել է 3-ի։

Առաջին հաստատված դեպքը գրանցվել էր ապրիլի 7-ին՝ Ղարաբաղի Միրիկ համայնքում։  Արցախի տեղեկատվական շտաբի փոխանցմամբ, վարակակված կինը մարտի 31-ի ընտրությունների նախօրեին Ղարաբաղ էր ժամանել Արարատի մարզից։ Ընտրություններին մասնակցել էր Միրիկում։ Օրեր անց՝ ապրիլի 2-ին, հոսպիտալացվել էր և, ըստ պաշտոնական աղբյուրների, մեկուսացվել։ Նրան տեղափոխել են Հայաստան՝ «Սուրբ Գրիգոր Լուսավորիչ» բժշկական կենտրոն։

Ապրիլի 9-ին հաստատված 2 դեպքերից մեկը փոխկապակցված է ապրիլի 7-ի դեպքի հետ․ վարակվածը Միրիկցի կնոջ հարսն է, որն ընտրություններին մասնակցել է Միրիկի հարևան Մոշաթաղ համայնքում՝ ըստ հաշվառման վայրի։

Արցախի տեղեկատվական շտաբի փոխանցմամբ, Միրիկ և Մոշաթաղ գյուղերի բնակիչները «ինքնամեկուսացված են իրենց առանձնատներում»։

Այսօր հաստատված դեպքերից մյուսը գրանցվել է Հայաստանի Հանրապետությունից Ղարաբաղ ժամանած ՀՀ քաղաքացու մոտ, ով, պաշտոնական հաղորդագրության համաձայն, «եկել էր ռիսկային բնակավայրից» և «մինչ թեստավորումը գտնվել է ինքնամեկուսացման մեջ»։ Առաջիկայում նա ևս կտեղափոխվի Հայաստան։

Tekali Taxi