Home / Բանակ / Իրավիճակը համեմատաբար հանգիստ է․ ՊՆ նախկին խոսնակը «ինֆոտուրեր» խոստացավ

Իրավիճակը համեմատաբար հանգիստ է․ ՊՆ նախկին խոսնակը «ինֆոտուրեր» խոստացավ

Ադրբեջանական Զինված ուժերի կողմից վերջին օրերին թիրախավորվել են Տավուշի մարզի Չինարի, Այգեպար, Ներքին Կարմիրաղբյուր, Պառավաքար բնակավայրերը։ Այսօր հրետակոծության է ենթարկվել նաև Բերդ քաղաքը․ թիրախավորվել են երկու գործարաններ։ Խաղաղ բնակչության շրջանում զոհեր չկան, վնասները նյութական են՝ տներ, գազատար և այլն։

Իջևանում տեղի ունեցած ճեպազրույցի ժամանակ այս մասին ասել է ճգնաժամային տեղեկատվական կենտրոնի համակարգող, նախկին ՊՆ խոսնակ Արծրուն Հովհաննիսյանը՝ հավաստիացնելով, որ սահմանամերձ բնակավայրերից տարհանումներ չեն եղել, «բնակչությունը վարժված է այս իրավիճակին», «համապատասխան արագությամբ զբաղեցրել է նկուղները և ռմբաապաստարանները», քաղաքացիականների մեջ վիրավորներ չկան։

Պաշտպանության նախարարությունը, ըստ նախկին խոսնակի, սահմանամերձ գոտի ժամանած լրագրողների համար վաղը, հուլիսի 15-ին, հատուկ «ինֆոտուրեր» կկազմակերպի և անձամբ ցույց կտա բոլոր «ավերածությունները, ինչու չէ՝ նաև կիրառվող զենք֊զինամթերքի մնացորդները և այլն»։ 

Տավուշի գործարանների և ձեռնարկությունների աշխատանքի դադարեցման վերաբերյալ հարցին Հովհաննիսյանը չպատասխանեց՝ խոստանալով, որ կպատասխանի վաղը։

Անպատասխան մնաց նաև վիրավորների ընդհանուր քանակին վերաբերող հարցը․ ՊՆ ներկայացուցիչը հավաստիացրեց, որ վիրավորների կյանքին վտանգ չի սպառնում, և խոստացավ վիրավորների ընդհանուր քանակին անդրադառնալ վաղը։

«Դիրքային առաջխաղացման» մասին հարցին Արծրուն Հովհաննիսյանը նույնպես չպատասխանեց։ Հայկական և ադրբեջանական լրատվականները վերջին օրերին տեղեկություններ են շրջանառում սահմանին հարող բարձրունքային դիրքերից մեկի գրավման մասին։ Հովհաննիսյանն այս տեղեկությունները չհաստատեց, բայցև չհերքեց․ ըստ նրա, պարզաբանումները և քարտեզագրումները կարող են վնասել Զինված ուժերին, իսկ այն, որ «Հայաստանի Հանրապետության Զինված ուժերը բոլոր տարիներին բոլոր հնարավոր շանսերը ստեղծել և օգտագործել են դիրքերը բարելավելու համար», ընդհանրապես պետք չէ քննարկել։

ՊՆ ներկայացուցիչը վստահեցրեց նաև, որ օպերատիվ ընդհանուր իրավիճակն այս պահին՝ սկսած մոտավորապես ժամը 18:00-ից, համեմատաբար հանգիստ է, կրակոցները քիչ են, մեծ տրամաչափի կրակոցներ առհասարակ չկան, լարվածությունը նվազել է, իսկ սահմանի այլ հատվածներում լարվածություն այս օրերի ընթացքում չի առաջացել։

Իրավիճակը Հայաստանի և Ադրբեջանի սահմանի Տավուշի հատվածում կտրուկ սրվել է հուլիսի 12-ին կեսօրից հետո։ Հրադադարի ռեժիմի խախտման և ռազմական էսկալացիայի մեջ կողմերը մեղադրում են միմյանց։ Երեկվանից դիրքերից բացի հրետանակոծվում են նաև բնակելի համայնքները․ հայկական կողմը հայտնել է Չինարի, Այգեպար, Ներքին Կարմիրաղբյուր, Պառավաքար գյուղերի և Բերդ քաղաքի, ադրբեջանական կողմը՝ Թովուզի շրջանի Դոնդար Գուշչու, Ալիբեյլի և Աղդամ գյուղերի  հրետակոծման մասին։

Հայաստանի Պաշտպանության նախարարությունը հաղորդել է 4 զոհերի մասին․ մահացու վիրավորում են ստացել մայոր Գարուշ Համբարձումյան և կապիտան Սոս Փայլակի Էլբակյանը, կրտսեր սերժանտներ Սմբատ Գաբրիելյանը և Գրիշա Մաթևոսյանը։

Ադրբեջանական կողմը հաստատել է իր 11 ռազմական զոհերը և հայտնել մեկ խաղաղ բնակչի սպանության մասին։