Home / Ոստիկանություն / Պուտինը պատրաստ է ներխուժել Բելառուս՝ «մոտիկներին օգնելու»

Պուտինը պատրաստ է ներխուժել Բելառուս՝ «մոտիկներին օգնելու»

Ռուսաստանի նախագահ Վլադիմիր Պուտինը հայտնել է իրավապահ մարմինների ներկայացուցիչների հատուկ պահեստազորի ձևավորման մասին՝ «անհրաժեշտության դեպքում» Բելառուսին աջակցություն ցուցաբերելու համար։

«Ալեքսանդր Գրիգորևիչը [Լուկաշենկո] խնդրել էր իրավապահների որոշակի պահեստազոր ձևավորել։ Եվ ես դա արել եմ։ Մենք պայմանավորվել ենք, որ այդ ջոկատը կօգտագործվի միայն այն դեպքում, երբ իրավիճակն իրոք դուրս գա վերահսկողությունից»,- «Ռոսիա 1» հեռուստաալիքին տված իր հարցազրույցում հայտնել է Պուտինը։ Նրա խոսքով, Բելառուսում ուժայինները «բավարար զսպված» վարք են դրսևորում։

Անվտանգության ոլորտում Ռուսաստանը պարտավորություններ ունի Բելառուսի նկատմամբ, և Լուկաշենկոն բարձրացրել է այդ հարցը, հավելել է Պուտինը։

Նա հայտարարել է, որ Ռուսական ուժերը չեն օգտագործվի, եթե «ծայրահեղական տարրերը չանցնեն սահմանները, չսկսեն մեքենաներ, տներ, բանկեր այրել, չփորձեն ադմինիստրատիվ շենքեր գրավել և այլն»։

Պուտինը հույս է հայտնել, որ ճգնաժամային իրավիճակը Բելառուսում կհանգուցալուծվի խաղաղ ճանապարհով։

«Դրությունը հիմա համեմատաբար հանդարտվում է։ Հուսով եմ բոլոր խնդիրները, իսկ դրանք իհարկե կան, հակառակ դեպքում մարդիկ փողոցներ դուրս չէին գա, կլուծվեն սահմանադրության, օրենքների և խաղաղ միջոցների շրջանակներում», – նշել է Պուտինը։

«Մենք, իհարկե, անտարբեր չենք Բելառուսի վիճակի նկատմամբ։ Դա մեզ շատ մոտ, գուցե՝ ամենամոտ, երկիրն է։ Թե՛ էթնիկ առումով է ամենամոտը, թե՛ լեզվական, թե՛ մշակութային, հոգևոր և այլն։ Մեր միջև տասնյակ, գուցե՝ հարյուր հազար, եթե ոչ՝ միլիոն, բարեկամական կապեր կան, արդյունաբերական սերտագույն համագործակցություն։

Բելառուսում ընտրությունների արդյունքների հրապարակումից ի վեր Պուտինը չեզոք դիրքորոշում էր պահում երկրում սկսված բողոքի ցույցերի վերաբերյալ։ Միակ հայտարարությունը Լուկաշենկոյին ուղղված շնորհավորանքն էր։