Պատերազմը վերապրածներին անվճար հոգեբանական աջակցություն կտրամադրվի

Կառավարությունն այսօրվա նիստին հաստատել է ղարաբաղյան 44-օրյա պատերազմին մասնակցած մարդկանց հոգեբանական ծառայություններ տրամադրելու վերաբերյալ նախագիծը։

Արտակարգ իրավիճակների նախարար Անդրանիկ Փիլոյանը նշել է, որ պատերազմի ավարտից հետո բնակչության 15-30 տոկոսի մոտ արտահայտվում է հետտրավմատիկ սթրեսային խանգարում, ուստի անհրաժեշտ են վերականգնողական միջոցառումներ թե պատերազմին ուղղակիորեն առնչվող մարդկանց, թե ընդհանուր բնակչության համար։

Թիրախային խմբերը ձևավորվել են ըստ խնդրի լուծման հրատապության և տրամադրվելիք հոգեբանական օգնության առաջնահերթության։

Ծրագրով նախատեսված թիրախային խմբերն են՝

• անհայտ կորած անձանց կամ ռազմագերիների ծնողները, ընտանիքի անդամները.


• գերության մեջ գտնված անձինք, նրանց ընտանիքի անդամները.


• ռազմական գործողությունների ընթացքում վիրավորում կամ հաշմանդամություն ստացած անձինք, նրանց ընտանիքի անդամները.


• զոհված զինծառայողների կամ քաղաքացիական անձանց ընտանիքի անդամները.


• ռազմական գործողություններին մասնակցած անձինք, այդ թվում՝զորահավաքային զորակոչով ներգրավվածները և կամավորականները.


• տեղահանվածները (հոգեբանական թեժ գծի աջակցությամբ)


• ուղղակի մասնակցություն չունեցող անձինք (հոգեբանական թեժ գծի աջակցությամբ):

• անհատական հոգեբանական աջակցություն և հոգեթերապիա (մինչև 8 սեանս)՝ 1-1,5 ժամ տևողությամբ.


• խմբային հոգեբանական աջակցություն և հոգեթերապիա (մինչև 8 սեանս)՝ 1-1,5 ժամ տևողությամբ.


• առցանց կամ հեռախոսով տրամադրվող հոգեբանական աջակցություն կամ հոգեթերապիա (մինչև 8 սեանս) 1-1,5 ժամ տևողությամբ.


• հոգեբանների շարժական խմբերի ծառայություն (մինչև 8 սեանս).


• հոգեբանական թեժ գծի ծառայություն.


• ընդհանուր հասանելիության մատչելի տեսաշարերի նկարահանում և ցուցադրում` ապահովելով հաշմանդամություն ունեցող անձանց համար մատչելի գործիքների առկայությունը, այդ թվում` ժեստերի լեզվի թարգմանություն, հայերեն լուսագրերի առկայություն.


• էլեկտրոնային հարթակների միջոցով ծառայություն: