Home / Շուկա / Հայաստանն ու Էյր Արբաիան նոր ավիափոխադրող են հիմնում՝ չնայած վատ հիշողությունների

Հայաստանն ու Էյր Արբաիան նոր ավիափոխադրող են հիմնում՝ չնայած վատ հիշողությունների

Հայաստանի կառավարությունն ու Արաբական Միացյալ Էմիրությունների ազգային փոխադրող «Էյր Արաբիա» 10-ական միլիոն դոլար են ներդնում՝ ավիաընկերություն հիմնադրելու համար․ նախագիծն ընդունվել է գործադիրի այսօրվա նիստին։

Դեռևս այս տարվա հուլիսի 14-ին «Հայաստանի պետական հետաքրքրությունների ֆոնդ» ՓԲԸ-ն և Էյր Արաբիայի դուստր ընկերության միջև կնքվել է պայմանագիր, որով կողմերը պարտավորվել են Հայաստանի Հանրապետությունում ստեղծել ազգային ավիաընկերություն:

Ըստ նախագծի՝ ընկերությունում բաժնեմասնակցության համար «Հայաստանի պետական հետաքրքրությունների ֆոնդ» ՓԲԸ պարտավորվել է բաժնետոմսերի դիմաց վճարել ավելի քան 4 միլիարդ 733 միլիոն դրամ — պետական բյուջեում այժմ նախատեսվում է 4,733,720,000 դրամ ելքերի ավելացում:

Ներդրումներ է իրականացնելու նաև Էյր Արաբիային պատկանող ընկերությունը՝ իր բաժնեմասնակցության համապատասխան:

Ավիաընկերության կառավարումն իրականացվելու է Էյր Արաբիայի կողմից, որն Մերձավոր Արևելքի ու Հյուսիսային Աֆրիկայի ամենամեծ ավիափոխադրողն է համարվում: 

Էյր Արաբիայի հետ համագործակցությունը, ըստ կառավարության, կարող է նպաստել ոչ միայն Հայաստանի քաղավիացիայի զարգացմանը, այլև «նախկինում ծագած խնդիրների կարգավորմանը»։

«Այս որոշումն արտահայտում է ՀՀ կառավարության՝ հայկական ավիաընկերություն ունենալու քաղաքական կամքը։ Սա չի նշանակում, թե Հայաստանում հայկական այլ ավիաընկերություններ չպետք է լինեն և չեն կարող լինել։

Հայաստանի կառավարությունն ու Էյր Արաբիայի դուստր ընկերությունն այժմ ներդնում են գումար՝ յուրաքանչյուրը 10 մլն դոլար։ Էյր Արաբիան ունի ավիաընկերություն ստեղծելու և զարգացնելու փորձառություն։ Այս փորձառության բերումով է, որ մենք այսպիսի գործընկերությունը կարևոր ենք համարում», – նիստի ընթացքում նշել է վաչապետ Նիկոլ Փաշինյանը։

Հիմնադրվող ավիաընկերությունը կկոչվի «Արնա»։

Հայաստանի օրենսդրության համաձայն՝ «ազգային փոխադրող» հասկացությունը, ըստ վարչապետի, կիրառելի է յուրաքանչյուր ընկերության նկատմամբ, որը գրանցված է Հայաստանի Հանրապետությունում՝ որպես հայկական ընկերություն․ «Ստեղծվող ավիաընկերությունը ոչ մի արտոնություն չի ունենալու և գործելու է հավասար մրցակցային դաշտում։ Միակ տարբերությունն այն է, որ կառավարությունը ներդրում է անում այստեղ։ Գիտեմ, որ կան որոշակի կասկածներ, մտավախություններ, տարընթերցումներ՝ մանավանդ հաշվի առնելով, որ այս ոլորտում մեղմ ասած տհաճ հիշողություններ ունենք, բայց կարծում եմ, որ մենք պետք է այս ճանապարհով գնանք՝ գիտակցելով նաև, որ ունենք որոշակի ռիսկեր, ինչպես ցանկացած ներդրման պարագայում։ Կարծում ենք, որ ստեղծել ենք բավարար պայմաններ, որպեսզի այդ ռիսկերը լինեն կառավարելի»։

Tekali Taxi