Ոստիկանությունից հետո բանտը փառք էր

Երևանյան «Բան» ակումբում ոստիկանական ռեյդից հետո սկսված դատավարությունը մոտենում է ավարտին։ Նոյեմբերի 21-ին նախավերջին դատական նիստն էր։

Քրեական գործով անցնող Ելիզավետա Դանիլիչևային մինչև 8 տարի ազատազրկում է սպառնում։ Նախորդ նիստին Ելիզավետային համարյա ազատ են արձակել՝ 6-ամսյա տնային կալանքը փոխարինվել է վարչական հսկողությամբ։ Մինչ այդ նա մոտ 9 ամիս պահվել է Աբովյանի բանտում։ Ելիզավետա Դանիլիչևային մեղադրում են 1.95 գրամ մետամֆետամին և 5.8 գրամ մարիխուանա պահելու և իրացնելու մեջ։ Ռեյդի ժամանակ 0․48 գրամ մետամֆետամինը հայտնաբերվել է Դանիլիչևայի մոտ, 1․47 գրամ մետամֆետամինը և 5․8 գրամ մարիխուանան՝ ակումբի հանդերձարանում, որտեղ այդ պահին ևս 4 հոգի կար։ Բոլոր ներկները պնդում են, որ թմրանյութը սենյակ է բերել փարթիին եկած մի տղա, որի դուրս գալուց անմիջապես հետո ներխուժել են ոստիկանները։ Իրացման փաստեր քննիչներն առհասարակ չունեն, մարիխուանայի և 1․47 գրամ մետամֆետամինի հետ Դանիլիչևայի կապը ապացույցներով հիմնավորված չէ։

Հիշեցնենք՝ անցած տարվա հունիսի 24-ին պարեկները մտել էին Բաղրամյան պողոտայում գործող «Բան» ակումբ։ Ակումբի այցելուներին, որոնց մեծ մասը հրավիրված էր հարսանեկան աֆթերփարթիի, փակել էին ներսում, մի քանի ոստիկանական բրիգադ կանչել և բոլորին՝ 38 հոգի, տարել Արաբկիրի բաժին։ Բաժնում մարդկանց ծեծել, նվաստացրել, հայհոյել, խեղդել և մերկացրել էին։ Զանգի իրավունք ոչ ոք չի ունեցել, թարգմանիչ չի հատկացվել։ 3 հոգու ձերբակալել էին, մյուսներին՝ ժամեր անց ազատ արձակել։ Մեղադրանք էր առաջադրվել միայն Ելիզավետային։

Հետագայում քրեական գործ էր հարուցվել նաև խոշտանգումների հոդվածով․ ակումբից բերման ենթարկվածները արձանագրել էին մարմնական վնասվածքները և հաղորդում ներկայացրել։ Այդ գործով որևէ առաջընթաց առ այսօր չկա։

Տեսանյութում Ելիզավետա Դանիլիչևային պատմում է ոստիկանական ռեյդի, քրեական գործի և իր ազատազրկման մասին (ռուսերեն)։

Տե՛ս նաև․

Տարեց ոստիկանը մտավ ու ապտակեց․ դատ

Ակումբում ռեյդը բարդել են մի կնոջ վրա․ դատ

Ոստիկանները դուխով ծեծում ու նվաստացնում էին տասնյակ մարդկանց