Epress.am Լուրեր Հայաստանից
2012 թ. մայիսի 4-ին Հանրապետության հրապարակում Հանրապետական կուսակցության կազմակերպած հանրահավաքի ժամանակ մեթան գազով լիցքավորված փուչիկների պայթյունի պատճառը եղել է բարձր ջերմաստիճանը և բաց կրակի ներգործությունը: Այսպիսի եզրահանգման են եկել փորձագետները` դատապայթյունատեխնիկական, դատահրդեհատեխնիկական և դատանյութագիտական համալիր փորձաքննության արդյունքում, գրում է «Առավոտը»:
Թերթի տեղեկություններով՝ նախաքննության ընթացքում պարզվել են փուչիկները լիցքավորած և Հանրապետության հրապարակ տեղափոխած անձանց ինքնությունները: Թերթը հարցադրում է անում՝ եթե առ այսօր կանոնակարգված չեն գազով փուչիկները լիցքավորելու մեխանիզմն ու պայմանները, ապա ո՞ր կանոնը խախտելու համար պետք է հասարակ փուչիկ լիցքավորողին կամ այն բռնողին պատասխանատվության ենթարկեն:
«Պատասխանատուն նախևառաջ այն գերատեսչությունն ու պաշտոնատար անձինք են, որոնց թողտվությամբ նշված ոլորտը մնացել է առանց կանոնակարգման: Արդեն մի քանի տարի է, որ մեր երկրում փուչիկները լիցքավորվում են գազով և այդ մասին պետք է որ տեղյակ լինեին նաև համապատասխան մարմինները, որոնք, սակայն, ոլորտը կանոնակարգել չեն շտապել: Որ չեն շտապել կամ քայլ իսկ չեն ձեռնարկել, ակնհայտ է դառնում նորմատիվ իրավական ակտի բացակայության փաստով», – եզրափակում է «Առավոտը»: