Աջափնյակում ՀՀԿ-ական «Պզեի» կողմնակիցները ծեծի են ենթարկել ՀԱԿ-ի ակտիվիստին

Աջափնյակ՝ Սիլիկյան թաղամասում, ծեծի են ենթարկել Հայ Ազգային Կոնգրեսի քարոզարշավն իրականացնող ակտիվիստներին, տեղեկացնում է Ilur.am-ը:

«Երբ Կոնգրեսի մի քանի աղջիկներ Ալիկի հետ դռնեդուռ քարոզչություն էին իրականացնում, մի քանի 16-17 տարեկան տղաներ մոտեցան, սկսեցին վիրավորել, քաշքշել, թե դուք այստեղ անելիք չունեք, գնացեք այստեղից: Երբ Ալիկը (Ալիկ Հախվերդյան) փորձեց հետ մղել նրանցից մեկին, թաղից մի քանի հոգի, այդ թվում՝ ավելի տարեցները վազելով մոտեցան, Ալիկին տարան շենքի անկյունը, որտեղից փախչել հնարավոր չէ, եւ սկսեցին ոտքերով հարվածել նրա գլխին», – պատմել է քարոզարշավի մասնակիցներից մեկը: Հարձակվողները հայտարարել են, թե իրենք թաղում հայտնի «Պզեի ախպերներն են», ու եթե հարցեր կան, կարող են Պզեին դիմել: Պզեն, տեղի բնակիչների պատմելով, ՀՀԿ-ական պատգամավոր է, ում անձը, սակայն, դեռ չի պարզվել:

Կայքի զրուցկցի խոսքով՝ տուժած ակտիվիստի գլխից առատ արյուն էր հոսում, մի քանի րոպե անց ժամանած շտապ օգնության մեքենան նրան տեղափոխել է «Արմենիա» բժշկական կենտրոն, որտեղ գլխի վերքի վրա կար է դրվել:

Ակտիվիստները նաև ոստիկանություն են կանչել, սակայն ոստիկանությունը դեպքի վայր չի ժամանել: Այժմ ակտիվիստների մի մասը ոստիկանության Մաշտոցի բաժանմունքում է, որոշներն էլ գնացել են հիվանդանոց՝ Ալիկին տեսության: