Կողմ և դեմ փաստարկներ․ ՌԴ հեռուստաալիքներն արգելելու հարցով կդիմեն ՀՌԱՀ-ին

Եվրամիության Արևելյան գործընկերության Քաղաքացիական հասարակության ֆորումի Հայաստանի ազգային պլատֆորմը դիմելու է Հեռուստատեսության և ռադիոյի ազգային հանձնաժողով (ՀՌԱՀ)՝ ներկայացնելով ռուսաստանյան «Россия-1» և «Первый канал» հեռուստաընկերությունների հաղորդումների այլատյացության և ազգամիջյան ատելության քարոզի փաստեր, գրում է media.am-ը:

Արևելյան գործընկերության Հայաստանի պլատֆորմը, որը համախմբում է շուրջ 200 հասարակական կազմակերպություններ, հայտարարություն էր տարածել, որով ՀՌԱՀ-ից պահանջում է կասեցնել ռուսաստանյան հեռուստաընկերությունների հեռարձակումը Հայաստանում և ազատված հաճախականությունը հանել լիցենզավորման մրցույթի:

Հայաստանյան պլատֆորմի համակարգող, Երևանի մամուլի ակումբի նախագահ Բորիս Նավասարդյանը հանրային քննարկում է ակնկալում հարցի շուրջ:

«Շատերը խնդրի առարկան և հայտարարության բուն իմաստը չեն ընկալում: Քննարկումը թույլ կտա ավելի լավ ընկալել և հասկանալ խնդրի իրավական և այլ կողմերը: Մաքսիմալ արդյունքը, որ սպասում ենք, նաև պաշտոնական մակարդակում քննարկում սկսելն է»,- ասում է Բորիս Նավասարդյանը:

Հայաստանյան պլատֆորմի անդամ՝ «Ազատ քաղաքացի» քաղաքացիական նախաձեռնությունների աջակցման կենտրոնի ներկայացուցիչ Հովսեփ Խուրշուդյանի խոսքով՝ ռուսաստանյան երկու հեռուստաընկերությունների կողմից օրենքի խախտման փաստերի պակաս չկա:

«Այդ հեռուստաընկերությունների հեղինակային հաղորդումների մեջ հեղինակների կողմից եղել է ոչ միայն այլատյացության, ազգամիջյան ատելության, այլև պատերազմի քարոզչություն: Բայց եթե ՀՌԱՀ-ի տեսողությունն, ինչպես միշտ, պրոբլեմատիկ է, որովհետև ՀՌԱՀ-ը խախտվող օրենքները չի տեսնում նույնիսկ հայկական հեռուստաընկերություններում, ուրեմն ավելի մանրամասն ցույց կտանք՝ խոշորացույցի ներքո»,- ասում է Հովսեփ Խուրշուդյանը:

Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը գտնում է, որ ռուսաստանյան «Россия-1» եւ «Первый канал» հեռուստաընկերությունների հեռարձակումը Հայաստանում պետք է օրակարգային հարց դառնա:

«Նշված հեռուստաալիքներով հիմնականում ատելություն է տարածվում մարդկության հանդեպ՝ ըստ ազգային պատկանելության, քաղաքական հայացքների եւ այլն, ինչը հակասում է ՀՀ օրենսդրությանը: Այսպիսի հեռուստաընկերությունների հաղորդումների տարածումը պետք է լրջորեն վերանայվի՝ ելնելով նրանցում ներկայացվող եւ ՀՀ Սահմանադրությանը հակասող մոտեցումներից»,- ասում է նա:

Արևելյան գործընկերության Հայաստանի պլատֆորմի մեկ այլ ներկայացուցիչ՝ Խոսքի ազատության պաշտպանության կոմիտեի նախագահ (ԽԱՊԿ) Աշոտ Մելիքյանը դեմ է ռուսաստանյան հեռուստաընկերությունների հեռարձակման կասեցմանը: Նա կարծում է, որ պլատֆորմի պահանջն անհիմն է, իսկ գույները՝ խտացված:

«Ռուսաստանի հեռուստաընկերությունները տարբեր ժամանակահատվածներում տարբեր լրագրողներ են ունեցել, որոնք քարոզչության գործիք են դարձել. ժամանակին Սերգեյ Դորենկոն էր, հիմա այդպիսի թյուրիմացություն է Դմիտրի Կիսելյովը: Բայց դա չի նշանակում, որ այդ հաղորդումների պատճառով պետք է կոչ անենք կասեցնել այդ հեռուստաընկերությունների գործունեությունը: Առհասարակ ցանկացած լրատվամիջոցի գործունեություն կասեցնելու հարցն ինձ մոտ ըմբոստություն է առաջացնում»,- ասում է Աշոտ Մելիքյանը:

Հեռուստատեսության և ռադիոյի ազգային հանձնաժողովը «Россия-1» և «Первый канал» հեռուստաընկերությունների ծրագրերում օրենքի խախտում չի արձանագրել: Media.am-ի հարցմանն ի պատասխան՝ ՀՌԱՀ-ի միջազգային կապերի, տեղեկատվության եւ զարգացման բաժինը նշել է․

«Համաձայն ՀՀ Սահմանադրության 27-րդ հոդվածի՝ « … Յուրաքանչյուր ոք ունի խոսքի ազատության իրավունք, ներառյալ՝ տեղեկություններ եւ գաղափարներ փնտրելու, ստանալու, տարածելու ազատությունը, տեղեկատվության ցանկացած միջոցով՝ անկախ պետական սահմաններից: Լրատվամիջոցների և տեղեկատվական այլ միջոցների ազատությունը երաշխավորվում է … » և «Հեռուստատեսության եւ ռադիոյի մասին» ՀՀ օրենքի 4-րդ հոդվածի 1-ին մասի՝«Հայաստանի Հանրապետությունում երաշխավորվում է հեռուստառադիոհաղորդումների ազատ ընտրության, արտադրության ու տարածման իրավունքը: Հեռուստառադիոհաղորդումների գրաքննությունն արգելվում է»: