Epress.am Լուրեր Հայաստանից
Մյանմայում ավելի քան մեկ ամիս առաջ տեղի ունեցած ռազմական հեղաշրջումից հետո երկրի տարբեր քաղաքներում բողոքի զանգվածային ցույցերը շարունակվում են։ Երեկվա ցույցերի ընթացքում անվտանգության ուժերը կրակ են բացել ցուցարարների ուղղությամբ. սպանվել է առնվազն 38 մարդ։
Երկրի իշխանությունը գրաված զինվորականներին ենթակա ուժերը մարդկանց խիտ խմբերի ուղղությամբ կրակում էին Յանգոնայում, Մանդալայում, Մյինջանում։ Սպանվածներից նվազագույնը երկուսն անչափահասներ են։
ՄԱԿ-ի Մյանմայի գծով հատուկ դեսպանորդ Կրիստին Շրաներ Բուրգեների տվյալներով, հեղաշրջմանը հաջորդած մեկ ամսվա ընթացքում նվազագույնը 50 ցուցարար է սպանվել։
Հիշեցնենք, որ Մյանմայում փետրվարի 1-ին ռազմական հեղաշրջում էր տեղի ունեցել։ Զինվորականները երկրում մեկ տարով արտակարգ դրություն են հայտարարել։ Ժողովրդավարական շարժման առաջնորդ Աուն Սան Սու Չժիին տնային կալանքի տակ է։
Փետրվարի 8-ից սկսած երկրում լայնամասշտաբ գործադուլներ են․ տասնյակ հազարավոր պետաշխատողներ աշխատանքի գնալու փոխարեն հավաքվում էին երկրի խոշորագույն քաղաքների փողոցներում։