Ոստիկանությունը բռնի էր, փողոցները՝ բաց, վրանները՝ տեղում

Առավոտյան 8։30-ից, ինչպես և հայտարարվել էր երեկվա «վճռորոշ» հանրահավաքին, ընդդիմադիրները՝ «Հայաստան» և «Պատիվ ունեմ» դաշինքների անդամները և նրանց համակիրները, փորձում էին փողոցներ փակել։

Երիտասարդների հետ միասին «անհնազանդություն» էին անում նաև ներկա ու նախկին պատգամավորները, նախկին նախարարներ ու այլ պաշտոնյաները։

Որոշ ժամանակով փակվել էին Բաղրամյան-Պռոշյան, Կորույն-Հերացի-Խանջյան, Սայաթ-Նովա-Չարենք,  Պուշկին-Մաշտոց խաչմերուկները․․․ Խցանվել էր Պլանի գլուխն ու Հաղթանակի կամուրջը։

 

Ընդդիմադիրները բեռնատար մեքենաներով փակել էին նաև Կիևյան փողոցը։

Փողոցները կարճ ժամանակ անց բացվում էին։

Ոստիկանները հաճախ բիրտ ուժ էին կիրառում։

Ժամը 14։00-ի դրությամբ բերման ենթարկվածների թիվը հասել էր 244-ի։

Նրանց մեծ մասը երեք ժամ անց ազատ է արձակվել։ Ցուցարարները ահազանգում են՝ որոշ մարդկանց նկատմամբ վարչական տույժ է կիրառվել։

Բերման է ենթարկվել նաև «Հայաստան» խմբակցության պատգամավոր Աշոտ Սիմոնյանը։ Պատգամավորի օգնական, Դաշնակցական Գերասիմ Վարդանյանը ձերբակալվել է․ նրան մեղադրանք է առաջադրվել։

[թարմացում – 20։38] Պաշտպանի փոխանցմամբ՝ Գերասիմ Վարդանյանը ձերբակալվել է մեկուկես տարի առաջ հարուցված քրեական գործի շրջանակներում: Նա մեղադրվում է նոյեմբերի 9-ին տեղի ունեցած իրադարձությունների առթիվ հարուցված քրեական գործի շրջանակներում:

«Ոստիկանների կողմից փողոցները բացվելիս կիրառվում է ֆիզիկական ուժ (երբեմն՝ նաև անհամաչափ): Հատուկ միջոցների կիրառում չի նկատվել: Համարյա բոլոր դեպքերում ուժ գործադրելուց առաջ ոստիկանները բանավոր առաջարկում են փողոցը բացել, բայց, ցավոք սրտի, լինում են նաև դեպքեր, երբ ուժը գործադրվում է առանց նախազգուշացման», – գրել է իրավապաշտպան Դանիել Իոաննիսյանը, որի գլխավորած կազմակերպությունը առավոտվանից մոնիթորինգ էր իրականացնում ակտիվության գրեթե բոլոր օջախներում։

«Նկատվել են դեպքեր, երբ ցուցարարները նոր փակված փողոցներում վեճի են բռնվել վարորդների հետ, բայց դա չի շարունակվել ոստիկանների ժամանումից հետո», – հավելել է Իոաննիսյանը։

Առավոտյան ակցիաների ընթացքում գրանցված երկու միջադեպերի վերաբերյալ «Իրազեկ քաղաքացիների միավորումն» արդեն իսկ հանցագործության մասին հաղորդում է ներկայացնել։

Իոաննիսյանի հրապարակած տեսանյութում երևում է, ինչպես են ոստիկանները բերման ենթարկում փողոց փակած տղամարդուն։ Ոստիկաններից մեկը մի քանի անգամ բռուցնքներով հարվածում է նրա գլխին։

Ոստիկանությունից հաղորդում են, որ ծառայողական քննություն են նշանակել։ Դատախազությունն ուսումնասիրում է նյութերը։

Օրվա ընթացքում աչքի են ընկել նաև Պաշտոնատար անձանց անվտանգությունն ապահովող պետական պահպանության ծառայողները։

Բաղրամյան-Պռոշյան խաչմերուկում լրագրողները մոտեցել են վերոհիշյալ ծառայության պետ Սարգիս Հովհաննիսյանին․ վերջինս այդ պահին հեռախոսով է խոսում, նախ՝ խփում է իրեն հարց տված լրագրողի բարձրախոսին, ապա հեռանում։ Նրա գործընկներներից մեկը՝ նույն Ծառայության աշխատակիցը, հարվածում է օպերատորի տեսախցիկին, այնուհետև՝ նաև օպերատորին։ 

Հաշվի առնելով ակցիաների մասնակցիների քանակը՝ 244 հոգուն բերման ենթարկելը կարելի է համարել զանգվածային։ Ոստիկանների գործողությունները հաճախ վերածվում էին հրմշտոցի և քաշքշուքի։

Ժամը 14։00-ին անհնազանդության ակցիաները պաշտոնապես ավարտված էին։ Այժմ ընդդիմադիրները Ֆրանսիայի հրապարակում են։

լուսանկարները՝ Էլիզա Մխիթարյանի