Epress.am Լուրեր Հայաստանից
Երեկ Վարչական դատարանը որոշում է կայացրել արգելել «Լիբեր» ՍՊԸ-ին Կոմիտաս 5 հասցեում շինարարական աշխատանքներ իրականացնել: Այս մասին Еpress.am-ի թղթակցին պատմել է Կոմիտաս 5ա շենքի բնակչուհի Նելլի Ոսկանյանը:
Կոմիտաս 5-ում շինարարության դեմ պայքարող Ոսկանյանն ասել է, որ դատարանը հիմնավորված է համարել Կոմիտաս 5ա, 3 և 7 շենքերի բնակիչների միջնորդությունը և որոշել է մինչ դատական ակտի օրինական ուժի մեջ մտնելը արգելել «Լիբեր» ՍՊԸ-ին գործողություններ իրականացնել: Նշենք, որ բնակիչները միջնորդել էին դադարեցնել շինարարությունը մինչ այն պահը, երբ դատարանը դրա օրինականության վերաբերյալ որոշում կկայացնի: Դատաքննությունը կկայանա նոյեմբերին:
«Մենք մասամբ հաղթեցինք, այս պահին բնակիչները համարում են, որ հաղթանակ են տարել, թեև վերջնական որոշումը կայացվելու է նոյեմբերի վերջին: Կարծում ենք, որ վերջնական հաղթանակը մերն է լինելու, քանի որ կառուցապատողը ներկա պահին ոչ նախագիծ ունի, ոչ էլ օրինական փաստաթղթեր», – ասել է մեր զրուցակիցը:
Նրա խոսքով՝ թեև որոշումը ենթակա է անհապաղ կատարման «Դատական ակտերի հարկադիր կատարման մասին» ՀՀ օրենքով, Կոմիտասի 5-ում այս պահի դրությամբ շինարարությունը շարունակվում է:
«Այսօր առավոտյան զանգել եմ ոստիկանություն և հայտնել, որ շինաշխատանքները չեն դադարեցվել, ոստիկանները եկան, սակայն ոչինչ չարեցին՝ ոստիկանությունը, ինչպես միշտ, նրանց կողմից է: Երկրորդ անգամ զանգեցինք ոստիկանություն, պատասխանեցին, թե կգան, ու չեկան», – ասել է Նելլի Ոսկանյանը: