Home / Հայաստան / Աշոտյանը պնդում է, որ գիտի «Կրոնի պատմություն» առարկայի դեմ պայքարողներին, բայց անուններ չի տալիս

Աշոտյանը պնդում է, որ գիտի «Կրոնի պատմություն» առարկայի դեմ պայքարողներին, բայց անուններ չի տալիս

Հայաստանի կրթության բովանդակությունը որոշում է ՀՀ կառավարությունը, որը աշխատել է և խորացնելու է Հայ Առաքելական եկեղեցու հետ աշխատանքը, իսկ կրոնի դասավանդումը սկսվելու է նաև տարրական դպրոցում:

Այս մասին այսօր ԱԺ-ում հայտարարել է Կրթության և գիտության նախարար Արմեն Աշոտյանը՝ անդրադառնալով այն հարցին, թե միջազգային զեկույցներում մտահոգություններ են արտահայտվել Հայաստանում կրոնի պատմության առարկայի դասավանդման շուրջ:

«Ցավոք, այդ միտքը զեկույցում հայտնվել է իրենց քաղաքացիական ակտիվիստներ համարող, հայկական արմատներ ունեցող, սակայն արևմտյան արժեքներ կրող, գրանտային կազմակերպություններից ֆինանսավորվող մարդկանց կողմից», – ասել է Աշոտյանը:

Նա հորդորել է պատգամավորներին այդ հարցին այլևս չանդրադառնալ, քանի որ աղմուկը արհեստական է, և «հայ հասարակությունը դեմ չէ եկեղեցու պատմության դասավանդմանը»:

«Ես գիտեմ՝ ով է դրա դեմ պայքարել, ինչքան փող է ստացել դրա համար: Սակայն այս բարձր ամբիոնից չեմ ուզում անուններ տալ, քանի որ սա բարձր ամբիոն է: Մեր համագործակցությունը Հայ Առաքելական եկեղեցու հետ անբեկանելի է, ինչպես անբեկանելի է Պաշտպանության նախարարության հետ: Որևէ նահանջ քայլ չենք անելու», – ասել է Աշոտյանը:

Նախարարը միջազգային զեկույցներ պատրաստողներին խորհուրդ է տվել ուշադրություն դարձնել հարևան երկրի՝ Ադրբեջանի դպրոցներում օգտագործվող դասագրքերին, որտեղ, Աշոտյանի խոսքով, այլատյացություն է քարոզվում։

Նշենք, որ կրոնի պատմության առարկային անդրադարձ էր եղել ԱՄՆ Պետդեպի 2013 թվականի զեկույցում։

«Օրենքով սահմանվում է, որ հանրակրթական դպրոցներում ուսուցումն աշխարհիկ է: Այնուհանդերձ, Հայաստանյայց առաքելական եկեղեցու պատմությունը ներառված է հանրակրթական առարկայացանկում և դասավանդվում է հանրակրթական դպրոցի ուսուցիչների կողմից: Եկեղեցին իրավունք ունի մասնակցել այդ առարկայի ուսումնական ծրագրի և դասագրքերի մշակմանը, այն դասավանդող ուսուցիչների որակավորման պահանջների սահմանմանը: Եկեղեցին կարող է նաև առարկան դասավանդող ուսուցիչների թեկնածություններ առաջադրել: Առարկան պարտադիր է. աշակերտները չեն կարող չհաճախել այդ առարկայի դասերին, և այլ կրոնական խմբերի աշակերտների համար առկա չեն այլընտրանքներ», – ասված էր զեկույցում: