Epress.am Լուրեր Հայաստանից
ԼՂՀ բանակում զոհված Հայաստանի քաղաքացիների ծնողների բազմիցս բարձրացրած հարցը, թե ինչ իրավական հիմքով է ՀՀ քաղաքացին ծառայում ԼՂՀ պաշտպանության բանակում, ՀՀ Կառավարությանը հղել է նաև Մարդու իրավունքների եվրոպական դատարանը: ՄԻԵԴ-ից հարցն ուղղվել է «Հրաչիկ Մուրադյանն ընդդեմ Հայաստանի Հանրապետության գործով»:
Հրաչիկ Մուրադյանի որդին՝ Սուրեն Մուրադյանը, մահացել է 2001 թվականին ԼՂՀ բանակում, մահվան փաստի առթիվ հարուցված քրեական գործը լսվել է «Սյունիքի ընդհանուր իրավասության դատարանի Ստեփանակերտի նստավայրում»: Մուրադյանի հայրը ներպետական ատյաններում պայքարել է առանց իրավաբանական աջակցության, սակայն բողոքը ՄԻԵԴ պատրաստել է փաստաբան Մուշեղ Շուշանյանը:
Զինծառայողի ԼՂՀ-ում ծառայելու և նրա մահվան գործը Ստեփանակերտում լսելու մասին ՄԻԵԴ-ի հարցին պատասխանելով ՝ ՀՀ կառավարությունը, Շուշանյանի խոսքով, հղում է կատարել գոյություն չունեցող փաստաթղթի:
«ՀՀ կառավարությունը հղում էր արել, որ ՀՀ քաղաքացու ծառայելը ԼՂՀ բանակում հիմնավորված է ՀՀ-ի և ԼՂՀ-ի միջև 1994 թվականին կնքված միջպետական համաձայնագրով: Դրա ինչ-որ կետով ՀՀ քաղաքացիները կարող են ծառայել Ղարաբաղում՝ իրենց կամքով: Եվ նույն համաձայնագրի մեկ այլ կետով սահմանվում է, որ այդ զինծառայողի հետ ԼՂՀ-ում ինչ-որ իրավախախտումները պետք է քննվեն ՀՀ իրավապահ մարմինների կողմից: Սակայն մեզ այդպես էլ չի հաջողվել գտնել որևէ նման միջպետական համաձայնագիր»,- ասել է Շուշանյանը:
Գործի մասին պատմելով՝ փաստաբանն ասել է, որ Մուրադյանը մահացել է իր նկատմամբ ֆիզիկական բռնության հետևանքով, սակայն պաշտոնական վարկածի համաձայն՝ մահվան պատճառը մալարիա հիվանդությունն էր: Շուշանյանն ասել է, որ զինծառայողին խոշտանգել են զորամասի հրամանատարի տեղակալը և հրետանու պետը, սակայն նրանք խուսափել են պատժից: Գործի նյութերում կա նաև այն ժամանակ ԼՂՀ ՊՆ նախարար Սերյան Օհանյանի նամակը, որով նա խնդրել է պատժից ազատել ռազմական պաշտոնյաններին այն հիմքով, որ նրանք մեծ ներդրում են ունեցել Արցախյան պատերազմում:
Շուշանյանի խոսքով՝ պատշոնյաներին անգամ մեղադրանք առաջադրված չի եղել:
«Հրաչիկ Մուրադյանն ընդդեմ ՀՀ գործով» ՄԻԵԴ-ը դեռ վճիռ չի հրապարակել: Հայցի հիմքում Մարդու իրավունքների եվրոպական կոնվենցիայի Կյանքի իրավունքի խախտման հոդվածն է: