Home / Դատարան / Բռնության ենթարկված կնոջն աջակցողները պահանջում են պատժել դատավորին

Բռնության ենթարկված կնոջն աջակցողները պահանջում են պատժել դատավորին

Վճռաբեկ դատարանի շենքի դիմաց մի խումբ քաղաքացիներ այսօր պահանջել են պատժի ենթարկել Լոռու մարզի ընդհանուր իրավասության դատարանի դատավոր Բորիկ Գրիգորյանին: Ցուցարարները պնդում են, որ դատավորն անօրինական որոշում է կայացրել՝ 5 երեխաների մայր Լուսինե Ղաբուզյանին պարտադրելով իր զավակներից 3-ին նրանց հոր մոտ թողնել մինչև դատական գործընթացի ավարտը։

Լուսինե Ղաբուզյանը 2015 թվականից չի ապրում իր քաղաքացիական ամուսնու՝ Կարեն Խեչոյանի հետ, ով համատեղ կյանքի ընթացքում նրան պարբերաբար ծեծի է ենթարկել։ Նա դիմել է դատարան, պահանջելով բոլոր երեխաներին իր մոտ թողնել. դատական գործընթացը դեռ չի ավարտվել, բայց դատավորը որոշում է կայացրել 5 երեխաներից 3-ին հոր մոտ թողնել։

«Դատավորն առանց կողմերին ծանուցելու 2016 թվականի դեկտեմբերի 27-ին որոշում է կայացրել՝ առանց պատճառաբանության սահմանափակելով Լուսինեի իրավունքներն իր երեխաների հանդեպ։ Նա Լուսինեին պարտադրում է վերադարձնել Կարեն Խեչոյանին 5 երեխաներից 3-ին: Լուսինեն անգամ չի ծանուցվել որոշման մասին, և մենք միայն 2017 թվականի հունվարին, երբ ԴԱՀԿ֊ից զանգահարել են, նոր տեղեկացել ենք, որ Լուսինեն պետք է երեխաներին վերադարձնի հորը։ Մենք բողոքում ենք, որովհետև չի կարելի անօրինաբար երեխաներին խլել մորից, այն դեպքում, երբ 1 տարի 6 ամիս հայրը թույլ չէր տալիս, որ մայրը տեսակցի նրանց։ Բացի դա, հոր խնամակալության տակ մնացած 3 երեխաներն անգամ նրա մոտ չեն եղել, այլ եղել են նրա ծնողների մոտ՝ Վանաձորում»,- Epress.am-ի հետ զրույցում իրավիճակը ներկայացրել է «Կանանց աջակցման կենտրոն» ՀԿ֊ի ներկայացուցիչ Հասմիկ Գևորգյանը։

Այս պահին 5 երեխաներն էլ գտնվում են մոր մոտ, քանի որ դեկտեմբերի 14-ին, երբ մայրը գնացել է դպրոց երեխաներին տեսնելու, նրանք ցանկացել են մոր հետ մնալ։

Գևորգյանի խոսքով՝ սա դասական ընտանեկան բռնության դեպք է․ կինը հերթական անգամ բռնության ենթարկվելուց հետո փախել է տանից, հայրն էլ ցանկանում է երեխաներին ստիպողաբար պահել իր մոտ․ «Այստեղ կա հստակ խտրականություն։ Սա հայրիշխանական համակարգի արդյունքն է։ Տղամարդկանցով հավաքվում են, տղամարդկանցով որոշում են։ Մինչև այսօր մարզը միշտ գործել է միայն ի օգուտ Կարեն Խեչոյանին, և միայն ոստիկանության անչափահասների բաժինն է օգնել Ղաբուզյանին։ Մնացած ոչ մի [պետական] կառույցից ոչ մի աջակցություն չի ստացել Լուսինեն»։

Գևորգյանը նաև տեղեկացրել է, որ ցույցի մասնակիցները նամակներ են հանձնել ՀՀ վարչապետ Կարեն Կարապետյանին, Մարդու իրավուքների պաշտպանին, Արդարադատության խորհրդին և պահանջել են կանխել դատավոր Բորիկ Գրիգորյանի նման վարքագիծը և նրա նկատմամբ պատժիչ գործողություններ կիրառել։

Նշենք, որ Կարեն Խեչոյանը մեղադրվել էր կնոջը՝ Լուսինե Ղաբուզյանին, և անչափահաս դստերը՝ Մարուսյա Խեչոյանին, պարբերաբար բռնության ենթարկելու մեջ։

2016 թվականի հունվարի 22-ին Լոռու մարզի ընդհանուր իրավասության դատարանը վճռել էր Խեչոյանին տուգանել 150 հազար դրամի չափով։

Ղաբուզյանը պատմել էր, որ ամուսինը ծեծում է իրեն, իսկ դստերը «դաստիարակում»՝ գոմի մսուրից շղթայով կապելով։ Վերջին ծեծից հետո Լուսինեն քթի կոտրվածքով, գլխուղեղի վնասվածքով և բազմաթիվ կապտուկներով ընկել է հիվանդանոց: Դուրս գալով հիվանդանոցից՝ նա դիմել է «Կանանց աջակցման կենտրոն», որտեղ էլ նրան և 2 երեխաներին առանձին կացարան են տրամադրել։ Այս պահին Լուսինեն բոլոր 5 երեխաների հետ գտնվում է գաղտնի կացարանում։ Ղաբուզյանի փաստաբան Նոնա Գալստյանի խոսքով՝ նա այնտեղ է բնակվում նախկին ամուսնու հետապնդումներից խուսափելու համար։