Մեծամասնականը չի վերացել, թաղային կրիմինալը նոր ԱԺ-ում ավելի շատ կլինի. պատգամավոր

Նոր ընտրական օրենսգիրքով Ազգային ժողովը ոչ թե կազատվի թաղային հեղինակություններից և կրիմինալից, այլ հակառակը, դրանք նոր ԱԺ-ում ավելի շատ կլինեն: Այս մասին այսօր  լրագրողների հետ ճեպազրույցում ասել է «Հայկական վերածնունդ» (նախկին ՕԵԿ) կուսակցության անդամ Մհեր Շահգելդյանը:

Նա ասել է, որ  ոչ միայն նոր խորհրդարանը չի ազատվի մեծամասնականով ընտրված  պատգամավորներից, այլև դրանք ԱԺ կգան ռեյտինգային քվեարկություններով և կկազմեն պատգամավորների 50 տոկոսը:

«Նորից թաղային հեղինակություններով, կրիմինալով ԱԺ կունենաք: Այս մշակույթը նորից ընտրական գործընթաց է բերվում: Եթե այսպես են անցկացվելու ԱԺ ընտրություները, ես ոչ մի փոփոխություն չեմ ակնկալում»,- ասել է նա:

Նշենք, որ եթե նախկին  ընտրական օրենսգրքով  ԱԺ էին ընտրվում 131 պատգամավորներ, որոնցից 41-ը մեծամասնական, 90-ը՝ համամասնական ցուցակով,  ապա նոր ԱԺ ընտրվելու են 101 պատգամավորներ, որոնցից 50-ը՝ տարածքային կոչվող ընտրական ցուցակներով, 51-ը՝ համապետական ընտրական ցուցակներով:

Այսինքն, եթե նախկինում մեծամասնականով ընտրված պատգամավորները կազմում էին ԱԺ-ի 45 տոկոսը, նոր ԱԺ-ում՝ տարածքային ընտրացուցակներով ընտրվածները կլինեն 50 տոկոս:

Հիշեցնենք, որ  Կառավարության առաջարկած  նոր ընտրական օրենսգիրքն ընդունվել է 2016 թվականի մայիսին: Կառավարությունը և ՀՀԿ պատգամավորները հիմնավորում էին, որ սա այն է, ինչ առաջարկում էր ընդդիմությունը տարիներ շարունակ: Մինչդեռ  ընդդիմությունը առաջարկում էր  անցնել 100-տոկոսանոց համամասնական ընտրական համակարգի:

ՀՀԿ-ական պատգամավոր Լևոն Մարտիրոսյանը օրենսգրքի քննարկումների ժամանակ կոչ էր անում ֆիքսել, որ ընդդիմության տարիների պահանջը՝ անցնել 100-անոց համամասնական ցուցակների,  փաստորեն սահմանվել է նոր Սահմանադրությամբ: Միևնույն ժամանակ  նա  ընդունում էր, որ սա «մաքուր»  100-անոց համամասնական համակարգ չէ, ինչը իր կարծիքով լավ է: