Home / Դատարան / «Սասնա ծռերի» գործով դատավորին հիշեցրել են՝ առանց փաստաբանների դատ չի կարող անցկացվել

«Սասնա ծռերի» գործով դատավորին հիշեցրել են՝ առանց փաստաբանների դատ չի կարող անցկացվել

«Սասնա ծռեր» խմբի գործով դատավոր Արտուշ Գաբրիելյանն այսօր նիստ է անցկացրել առանց խմբի անդամների պաշտպանների մի մասի և սանկցիա կիրառել բացակա փաստաբանների նկատմամբ՝ դիմելով Փաստաբանների պալատ կարգապահական վարույթներ անցկացնելու խնդրանքով։ Այս մասին Epress.am-ի հետ զրույցում ասել է նիստը բոյկոտած փաստաբաններից, Պավել և Արամ Մանուկյանների պաշտպան Հարություն Բաղդասարյանը։

Ըստ քրեական դատավարության օրենսգրքի՝ առանց փաստաբանների նիստ առհասարկ չէր կարող կայանալ, այն պետք է հետաձգվեր։ 10 փաստաբանները չեն մասնակցել նիստի՝ ի սոլիդարություն իրենց կոլեգաներ Արայիկ Պապիկյանի և Մուշեղ Շուշանյանի, ում դատարան չեն թողել մտնել կարգադրիչները։ Երկու փաստաբանները թույլ չեն տվել, որպեսզի դատարանի շենք մտնելիս իրենց խուզարկեն։

Իմանալով, որ իրենց դեմ սանկցիա է կիրառվել, փաստաբանները դիմում են գրել Արտուշ Գաբրիելյանին՝ ընդգծելով, որ առանց իրենց նիստ չէր կարող անցկացվել։

«Արգելվել է Արայիկ Պապիկյանի և Մուշեղ Շուշանյանի մուտքը նիստերի դահլիճ, որի կապակցությամբ միջնորդություն ենք ներկայացրել։ Ստիպված ենք հիշեցնել, որ Դուք որպես նախագահող դատավոր պարտավոր եք միջոցներ ձեռնարկել, որ բոլոր պաշտպանները մտնեն նիստերի դահլիճ։ Ձեր պարտականությունն է ապահովել օրենքի պահանջները, մեր պաշտպանյալների իրավուքները, այդ թվում՝ իրենց ընտրած պաշտպանի միջոցով պաշտպանություն իրականացնելու, ողջամիտ ժամկետներում գործը քննելու, և այլ իրավունքների, որպիսիք ինչպես ցույց է տալիս փորձը, Դուք մինչ օրս չեք իրականացրել», ֊ ասված է դիմումում։

Նշենք, որ Արտուշ Գաբրիելյանն ունի նաև փորձ առանց ամբաստանյալների նիստ անցկացնելու։ Բոլոր 18 ամբաստանյալների նկատմամբ նա սանկցիա էր կիրառել և հեռացրել դահլիճից հուլիսի 6-ի նիստին։

«Սասնա ծռերի» պաշտպաններն Արտուշ Գաբիելյանին ինքնաբացարկի միջնորդություն են ներկայցրել նաև այն ժամանակ, երբ նրանց պաշտպանյալներին ծեծել էին դատարանի շենքի ներսում։

Ամբաստանյալներ Արեգ Կյուրեղյանին, Արայիկ Խանդոյանին, Սմբատ Բարսեղյանին, Գագիկ Եղիազարյանին և Մխիթար Ավետիսյանին դատարանի նկուղում ծեծելու համար որևէ ոստիկանի մեղադրանք չի առաջադրվել։