Խորհրդարանն այսօրվա արտահերթ նիստին քննարկում էր վարկային համաձայնագրերի վավերացման հարցը, որոնց միջոցով նախատեսվում է լրացնել 2019 թվականի պետական բյուջեի պակասուրդը (դեֆիցիտը): Վարկային համաձայնագրերի ընդհանուր արժեքը 131.4 մլն եվրո է (~152 միլիոն դոլար):
Ֆինանսների փոխնախարար Արմեն Հայրապետյանի խոսքով՝ վարկային համաձայնագրերը նախատեսված են եղել 2019 թվականի պետական բյուջեի մասին օրենքով, որը ընդունվել է դեռևս 2018-ին․ «2019 թվականի բյուջեով ունենք ֆինանսական հոսքերի դեֆիցիտ, որի ֆինանսավորման համար նախատեսվել է արտաքին աղբյուրներից ֆինասնսների ներգրավում։ Փորձել ենք դոնորների հետ քննարկելով հասնել այն արդյունքին, որ կարողանանք ֆինանսական բացը փակել։ Ունենալու ենք ֆինանսական միջոցների բաց, եթե դա տեղի չունենա [վարկը չհաստատվի], ստիպված ենք լինելու այլ աղբյուրներից լրացնել, ինչը կարող է հանգեցնել ֆինանսական անկայունության»։
Թեև վերջին շրջանում որոշակի տնտեսական աճ է արձանագրվել, հավելյալ մուտքեր են ապահովվել բյուջե և շուրջ 62 միլիարդի չափով հարկային եկամուտների ավելացում կա, այլ ավելացումը, ըստ փոխնախարարի, ծրագրավորվել է ծախսերի համար, հետևաբար դեֆիցիտի մասով ֆինանսական պահանջը մնացել է նույնը։
Նա հավաստիացրեց նաև, որ սրանք վերջին բյուջետային վարկերն են, որ վերցնում է պետությունը․ 2020 թվականի արդեն հաստատված բյուջեում ոչ մի բյուջետային փոխառություն նախատեսված չէ։
Ընդդիմադիր պատգամավորները դատապարտեցին Կառավարությանը՝ վարկային միջոցների հաշվին բյուջեի պակասուրդը լրացնելու, նոր պետական պարտք կուտակելու և նման կարևոր հարցը արտահերթ նիստով «ափալ-թափալ» անցկացնելու համար։
Քննադատություններին արտահերթ ելույթով արձագանքեց Ազգային ժողովի խոսնակ, «Իմ քայլը» խմբակցության պատգամավոր Արարտ Միրզոյանը։ Միրզոյանը, նախ, դիմեց խորհրդարանական մեծամասնությանը․ «Իզուր են մեծամասնության կոչերն ուղղված ընդդիմությանը` կողմ քվեարկել այս նախագծերին: Կան չգրված կանոններ․ ընդդիմությունը որպես կանոն կողմ չի քվեարկում բյուջեին, Կառավարության ծրագրին, վարկային համաձայնագրերին։ Մենք էլ որ ընդդիմություն լինենք, մենք էլ ենք տենց անելու, նորմալ է․․․Վերնագիրը վարկային համաձայնագիր է` ընդդիմությունը պիտի քլնգի»։
Անդրադառնալով քննարկվող համաձայնագրերին, Միրզոյանը նշեց՝ աբսուրդ կլինի չվավերացնել և հրաժարվել դրանցից․ «Այս վարկային համաձայնագրերը տնտեսագիտության մասին չեն, սրանց կոնտեքստը քաղաքական է: Մեր գործերն այնքան լավ են, որ մեզ առաջարկում են էժան փող, շատ էժան փող: Մենք այնպիսի առաջընթացներ ենք արձանագրել տարբեր բարեփոխումների գծերով, մեր երկրի վստահությունը, կայունությունը, կանխատեսելիությունը միջազգային գործընկերների, այդ թվում՝ ֆինանսական հաստատությունների համար այնքան է աճել, որ իրենք գիտեն, որ թեև մենք իրենց պարտք ենք փող՝ 5 տոկոսով, առաջարկում են մեզ փող՝ 1.6 տոկոսով, թվերը պայմանական եմ ասում»։
Նա ընդգծեց՝ վարկատուներն էլ գիտեն, որ այս էժան փողը դնելու ենք տնտեսության մեջ, իսկ այլ միջոցներից տանելու ենք, իրենց 5 տոկոսանոց վարկը մարենք:
«Սա ակնհայտ, աներկբա և անքննելի շահավետ տարբերակ է Հայաստանի Հանրապետության համար։ Ես այսպես եմ ընկալում, թող հիմա մյուս հարցի ժամանակ տնտեսագետներն ասեն՝ սխալ եք ասում: Հրաժարվել այս առաջարկից՝ աբսուրդ է, այնպես որ մոռացեք բոլոր տնտեսական փաստարկները. սա քաղաքական հարց է և շատ շահավետ»,- եզրափակեց Ազգային ժողովի խոսնակը։
Արտահերթ նիստի օրակարգում ներառված վարկային համաձայնագրերի թիվը 4-ն էր։ Առաջինը համաձայնագիրը՝ կնքված Հայաստանի Հանրապետության և Վերակառուցման ու զարգացման միջազգային բանկի միջև, նախատեսում է 45.8 մլն եվրո վարկ։ Երկրորդը՝ կնքված Ասիական զարգացման բանկի հետ, նախատեսում է 9,1 մլն եվրո վարկ։ Երրորդ համաձայնագիրը՝ կնքված Վերականգնման վարկերի բանկի հետ, նախատեսում է 40 մլն եվրո վարկ։ Եվ չորրորդը՝ կրկին Ասիական զարգացման բանկի և Հայաստանի Հանրապետության միջև, նախատեսում է ևս 36,5 մլն եվրո վարկ։