Home / Հայաստան / Մեր լեգիտիմությունը նրանում չէ, որ մեզ չեն փակել կոռումպացված ռեժիմի ժամանակ

Մեր լեգիտիմությունը նրանում չէ, որ մեզ չեն փակել կոռումպացված ռեժիմի ժամանակ

Որևէ խնդրի խորքային պատճառը բևեռացումն է, որովհետև դա մեկին մյուսի դեմ հանելու, վախեր և ատելություն սերմանելու ամենահեշտ ճանապարհն է։ Այս մասին «Հակաքարոզչությունը բաց հասարակության դեմ» թեմայով մամուլի ասուլիսի ընթացքում հայտարարել է «Բաց հասարակության հիմնադրամներ Հայաստան»-ի գործադիր տնօրեն Լարիսա Մինասյանը։

Հայաստանյան գրասենյակի անձնակազմի և այստեղ այցելող քաղաքացիների՝ հետապնդումների և հոգեբանական ճնշումներին ենթարկվելու մասին հայտարարվում է 2019-ի աշնանից։ Հոկտեմբեր ամսին քաղհասարակության նկատմամբ թշնամանքի հրահրումը դատապարտեցին ԱԺ պատգամավորները։ Հիմնադրամի դեմ արշավի ակտիվ մասնակիցներից էր նախկին ոստիկանապետ Վլադիմիր Գասպարյանի խորհրդական Նարեկ Մալյանն, ով երեկ՝ «Ադեկվատ» միաբանության անդամ Կոնստանտին Տեր-Նակալյանի հետ միասին նախ բերման էր ենթարկվել, ապա՝ ազատ արձակվել ապօրինի զենք-զինամթերք պահելու կամ կրելու կասկածանքով։

Բևեռացման հարցը լուծելու ճանապարհը, Հիմնադրամի գործադիր տնօրենի խոսքով, բաց և որակյալ քաղաքական դիսկուրսին աջակցելն է․

«Ես դրա հնարավորությունը տեսնում եմ միայն բաց և որակյալ քաղաքական դիսկուրսին աջակցելու մեջ, երբ տարբեր տեսակետներ ամենապռոբլեմատիկ հարցերի շուրջ կդրվեն քաղաքական քննարկման և կքննարկվեն ոչ թե դավադրության տեսությունների, վախերի, այլ փաստերի և հնարավորությունների [հիման վրա]։ Միայն այդ պարագայում եմ ես տեսնում դժվար հարցերի հնարավոր լուծումներ, իսկ որ մենք հեշտ հարցեր հիմա համարյա չունենք, դա ակնհայտ է»։

«Բաց հասարակության հիմնադրամներ Հայաստան»-ն աջակցում է կայուն և համակարգային փոփոխությունների, որոնք ուղղված են ավտորիտար և կոռումպացված համակարգերի վերադարձի բացառմանը։ Արդեն տևական ժամանակ է՝ Հիմնադրամի և դրա գործընկերների դեմ լայնածավալ հակաքարոզչություն և տեղեկատվական աննախադեպ ագրեսիվ արշավ է իրականացվում, որն ուղեկցվում է ատելության քարոզով և հաճախ՝ բռնության անթաքույց կոչերով։ Իսկ արշավի հեղինակներն, ընդգծել է Մինասյանը, նենգափոխում են Հիմնադրամի գործունեությունն ու դրա առաքելությունը։ Կազմակերպության հայտարարությունն ընթերցելով, նա կոչ արեց ԶԼՄ֊ներին չներգրավվել ատելության և ստի արշավի մեջ։

Անդրադառնալով լրատվամիջոցներում առավել հաճախ շրջանառվող կեղծ լուրերին, Մինասյանը մի քանի օրինակ բերեց․

«Սուտ՝ Ջորջ Սորոսն իր ունեցվածքը ձեռք է բերել տարբեր երկրներում արհեստական ճգնաժամեր և հեղափոխություններ հրահրելով, և «Բաց հասարայության հիմնադրամները» դերակատարություն են ունեցել այդ գործում։ Փաստ՝ Ջորջ Սորոսն իր ունեցվածքը ձեռք է բերել ժողովրդավարական երկրների ֆինանսական շուկաներում, որոնք վերահսկվում են խիստ կարգավորիչ մարմինների կողմից։

Սուտ՝ Հիմնադրամը ֆինանսավորել է Ադրբեջանի հանդեպ միակողմանի խաղաղության քարոզը։ Փաստ՝ Հիմնադրամն Ադրբեջանի հանդեպ խաղաղության քաչոզ չի՛ ֆինանսավորել, Լեռնային Ղարաբաղի հակամարտության հետ կապված որևէ նախաձեռնություն երևէ չի ֆինանսավորել։

Սուտ՝ Հիմնադրամը դրամաշնորհ է տրամադրել ՀՀ աշխատանքի և սոցիալական հարցերի նախարար Զարուհի Բաթոյանին, նախարարի տեղակալ Գեմաֆին Գասպարյանին, ՀՀ կրթության, գիտության, մշակույթի, սպորտի նախարարի տեղակալ Արևիկ Անափիոսյանին և պետական պաշտոն զբաղեցնող մի շարք այլ անձանց։ Փաստ՝ Հիմնադրամը կազմակերպությունների է դրամաշնորհ տրամադրել, որտեղ աշխատել են այդ մարդիկ մինչ պետական պաշտոն զբաղեցնելը»։

Հանրային դիսկուրս է ներմուծվում սուտը, իսկ այն մասին, թե կոնկրետ ով է դա անում, հստակ խոսեց նաև վարչապետ Նիկոլ Փաշինյանը։

«Մեր լեգիտիմությունը նրանում չէ, որ մեզ չեն փակել և մենք գործել ենք դեռ նախորդ՝ կոռումպացված, ավտորիտար ռեժիմի ներքո։ Մեր լեգիտումությունը նրանում է, ինչ մենք անում ենք, և անում ենք դա թափանցիկ, բաց և հաշվետու ձևով», – նշել է Լարիսա Մինասյանը։

«Բաց հասարակություն հիմնադրամներ»֊ը հիմնադրվել են ամերիկացի ներդրող, բիզնես-մագնատ, բարերար Ջորջ Սորոսի կողմից, ով 1984 թվականից ի վեր 14 միլիարդ դոլար է նվիրաբերել բարեգործությանը։ Ամբողջ աշխարհում հիմնադրամն աջակցում է անհատներին և կազմակերպություններին, որոնք պայքարում են մարդու իրավունքների պաշտպանության, արտահայտման ազատության, հաշվետու և թափանցիկ կառավարման, արդարության և հավասարության համար։ Ասուլիսին հնչած հայտարարության համաձայն, Հայաստանում կառույցն իր գործունեությունն սկսել էր 1997 թվականին և այդ օրվանից աջակցում է մարդու իրավունքների պաշտպաններին, ընտանեկան բռնության և խոշտանգումների դեմ աշխատանք ծավալող կազմակերպություններին, հետաքննող լրագրողներին, ընտրությունների և պետական, հանրային, համայնքային մշտադիտարկում անցկացնող կազմակերպությունների, կրթական, մշակութային, առողջապահական հաստատությունների։ «Հիմնադրամն ուղղակի և անփոխարինելի ներդրում ունի ՀՀ֊ում մարդու իրավունքների և ժողովրդավարական արժեքների տարածման գործում և հպարտությամբ շարունակելու է այդ գործունեությունը», ֊ մասնավորապես, ասված էր հայտարարության մեջ։