Epress.am Լուրեր Հայաստանից
Արդարադատության նախարարությունը առաջարկում է ռազմական դրության ժամանակ սահմանափակել համացանցը՝ «ապահովելով բացառապես ռազմահայրենասիրական բովանդակությամբ հեռուստաֆիլմերի ու հաղորդաշարերի ցուցադրումը և տեղեկատվության տարածումը»․ կայքերը, սոցցանցերը և հավելվածները կարող են արգելափակվել, ինտերնետ-հասանելիությունը՝ մասնակի կամ ամբողջությամբ սահմանափակվել։
«Ռազմական դրության իրավական ռեժիմի մասին» օրենքում փոփոխությունների նախագիծն արդեն e-draft-ում է։ Հիմնավորման համաձայն, հեղինակները փորձում են լրացնել իրավական բացը։
Գործող օրենքը, ըստ արդադատության նախարարության, արդեն իսկ սահմանափակում է կարծիքի արտահայտման ազատությունը․ ռազմական դրության ժամանակ կարող են ժամանակավորապես առգրավվել և կալանքի տակ վերցվել տպագրող սարքերը, ռադիոհեռարձակող, ձայնաուժեղացնող միջոցները, բազմացնող տեխնիկաները և այլն, լրագրողների հավատարմագրման հատուկ կարգ, կապի միջոցներից օգտվելու հատուկ կանոններ կարող են սահմանում։
Համացանցի մասին գործող օրենքում խոսք չկար: Արդադատության նախարարությունն էլ, իբր, որոշել է լրացնել այս բացը։
Նախագծով նախատեսվում է ամրագրել հետևյալը.
ՀՀ տարածքում ռազմական դրություն հայտարարվելու դեպքում հեռուստատեսությամբ հեռարձարկվող և համացանցի միջոցով տարածվող բովանդակության (կոնտենտի) սահմանափակում՝ ապահովելով բացառապես ռազմահայրենասիրական բովանդակությամբ հեռուստաֆիլմերի ու հաղորդաշարերի ցուցադրումը և տեղեկատվության տարածումը.
ՀՀ տարածքում ինտերնետային կայքերի, սոցիալական ցանցերի, ինտերնետային հավելվածների գործողության ժամանակավոր կասեցում (արգելափակում), ինչպես նաև ինտերնետ հասանելիության մասնակի կամ ամբողջական սահմանափակում.
ՀՀ տարածքում ինտերնետ հասանելիության սահմանափակման դեպքում պետական կառավարման համակարգի և ՏԻՄ-երի, ռազմավարական նշանակության և պետական պահպանության ենթակա օբյեկտների և ենթակառուցվածքների, ինչպես նաև առանձին կազմակերպությունների (անկախ կազմակերպական-իրավական ձևից) ինտերնետ հասանելիության ապահովում:
Նախագծի համաձայն՝ ռազմական դրության պայմաններում կիրառվող ոչ ռազմական բնույթի միջոցառումների իրականացման և սահմանափակումների կիրառման լիազորությունը տրվելու է փոխվարչապետին, որը կարող է ընդունել ենթաօրենսդրական ակտեր։ Կառավարության որոշմամբ կարող է ստեղծվել ռազմական դրության տարածքի հատուկ կառավարման խորհուրդ՝ որպես Հայաստանի Հանրապետության վարչապետին կից խորհրդակցական մարմին: Խորհուրդը ղեկավարելու է վարչապետը:
Հիշեցնենք՝ Գրիգոր Մինասյանը (Սերժ Սարգսյանի փեսա Միքայել Մինասյանի եղբայրը) այսօր նշանակվել է Արդադատության նախարար․ մինչ այս նա փոխնախարար էր։