Ձերբակալված փոխնախարարը վերջերս խնդրահարույց ֆոնդի նախագահ էր նշանակվել

թարմացում (22:00) — Քննչականը հաստատել է՝ կոռուպցիոն չարաշահումներին առնչվող քրեական վարույթներով ձերբակալվել են էկոնոմիկայի նախարարության 7 պաշտոնատար անձինք։ Առաջին գործը «Հանրային ներդրումային ծրագրերի բանկի ստեղծմանն» է առնչվում (չարաշահումների արդյունքում մրցույթում հաղթող է ճանաչվել մրցակցից շուրջ 3 անգամ ավել՝ մոտ 392 միլիոն դրամ գնային առաջարկ ներկայացրած ընկերությունը), երկրորդը՝ ինտենսիվ այգիների հիմնման ծրագրին (չարաշահումների արդյունքում մոտ 238 միլիոն դրամ է վատնվել»։

մանրամասները՝ 238 միլիոնի վատնում և այլն․ փոխնախարարի ձերբակալության պաշտոնական վարկածը

15։15 — Ձերբակալել են էկոնոմիկայի փոխնախարար Անի Իսպիրյանին և այլ անձանց՝ գրել է հանրային հեռուստաընկերության «Lուրեր» կայքը։

Էկոնոմիկայի նախարարությունում լայնածավալ քննչական գործողություններ են ընթանում։ Քննչական կոմիտեից ասել են, որ երկու տարբեր քրեական վարույթ կա նախաձեռնված, ՔԿ-ն և ԱԱԾ-ն խուզարկություններ են անում նախարարությունում և մի շարք անձանց բնակարաններում՝ ընդհանուր առմամբ ավելի քան 15 վայրերում:

«Կոռուպցիայի դեմ պայքարը համարում ենք գերկարևոր, բայց պահպանում ենք անմեղության կանխավարկածը», – լրագրողների հարցերին ի պատասխան ասել է նախարարության խոսնակը։

Փոխնախարարի ձերբակալության մասին պաշտոնական հայտարարություններ դեռ չկան։ Քրեական գործի մանրամասները չեն հրապարակվել։

Անի Իսպիրյանը էկոնոմիկայի նախարարի տեղակալ է նշանակվել 2021-ին, այսօր վարչապետի որոշմամբ նա ազատվել է պաշտոնից:

Լրագրողների դիտարկմանը, որ փոխնախարար Իսպիրյանի ազատումը համընկել է այս գործողությունների հետ, Էկոնոմիկայի նախարար Վահան Քերոբյանը պատասխանել է՝ իր կարծիքով սա ընդամենը պատահականություն է, և հայտնել, որ իր տեղակալը 1,5 ամիս առաջ ասել էր, որ պատրաստվում է տեղափոխվել Հոլանդիա։ Պարզ չէ՝ եթե Իսպիրյանը մեկուկես ամիս առաջ արտագաղթելու ցանկություն է հայտնել, ինչո՞ւ է նա վերջերս նշանակվել ֆինանսական և կազմակերպչական ճգնաժամի մեջ հայտնված և չարաշահումների մեջ մեղադրվող «Հայաստանի պետական հետաքրքրությունների ֆոնդի» խորհրդի նախագահ։

Անցած տարվա դեկտեմբեր-հունվար ամիսներին էկոնոմիկայի նախարարության միջնորդությամբ ցրվել էր Fly Arna ավիաընկերության հայկական բաժնետիրոջ՝ «Հայաստանի պետական հետաքրքրությունների ֆոնդի» (ԱՆԻՖ) տնօրենների խորհուրդը։ ԱՆԻՖ-ը անցնում է չարաշահումների հոդվածով հարուցված քրեական գործով։ Ըստ Հակակոռուպցիան կոմիտեի, ենթադրյալ չարաշահումները տեղի են ունեցել 2019-ից 2023 թվականներին։ Այն ժամանակ ընկերության տնօրենների խորհուրդը նախագահում էր նախկին փոխվարչապետ, Երևանի ներկա քաղաքապետ Տիգրան Ավինյանը։ Արժույթի միջազգային հիմնադրամը՝ IMF-ը, և Պետական վերահսկողական ծառայությունը հայտնել էին, որ «ընկերությունում հայտնաբերվել են պետությունից ստացված ֆինանսական միջոցները անարդյունավետ ծախսելու բազմաթիվ դրվագներ»։ Սկանդալի ֆոնին էկոնոմիկայի նախարարությունը ցրել էր տնօրենների խորհրդը։ Շաբաթներ առաջ խորհրդի նոր նախագահ էր նշանակվել հենց Անի Իսպիրյանը։

տե՛ս՝ Fly Arna-ն՝ «Հայկական ազգային ավիաուղիները» խաբեց