Epress.am Լուրեր Հայաստանից
Զինվորական բժիշկ Վահե Ավետյանի սպանության դեպքով մտահոգված քաղաքացիները հավաքվում են Զեյթուն թաղամասի շուկայի մոտ, որտեղից երթով շարժվելու են դեպի Ավետյանի տուն: Այսօր, ժամը 14:00-ին կայանալու է Ավետյանի հուղարկավորության արարողությունը:
Ինչպես հաղորդում է Epress.am-ի թղթակիցը, շուկայի մոտ փոքր միջադեպ է գրանցվել: Հավաքված մարդկանց են մոտեցել մի խումբ կանայք և հորդորել են լքել շուկայի տարածքը՝ հայտարարելով, որ Հայաստանում ամեն օր բազմաթիվ մարդիկ են մահանում, և կարիք չկա նման ակցիա անցկացնել:
Այնուամենայնիվ, ակցիայի մասնակիցները համոզել են կանանց չխանգարել իրենց շարունակել երթը:
Երթի մասնակիցներից մի քանիսի խոսքով՝ այս կանայք ուղարկված են ԱԺ պատգամավոր Սամվել Ալեքսանյանի կողմից, ով Ռուբեն Հայրապետյանի ընկերն է:
Ակցիայի մասնակից ԲՀԿ-ական պատգամավոր Նաիրա Զոհրաբյանը, իր հերթին, կոչ է արել այս քրեական գործը չքաղաքականացնել:
Հարցին՝ արդյոք այս գործի շրջանակներում չպետք է հարցաքննվի Ռուբեն Հայրապետյանը, Զոհրաբյանն ասել է, որ չի ցանկանում խախտել որևէ մեկի անմեղության կանխավարկածը:
«Չեմ կարծում, որ հրահանգով է արվել: Պարզապես զարմանում եմ՝ ինչպես մարդ կարող թէ հասնել գազանության այն աստիճանի, որ ուրիշի կյանքը խլի: Գազանությունը հովանավորություն չպետք է ունենա: Այս հարցը քաղաքական չէ: Այստեղ ընդդիմություն, իշխանություն, քաղաքացիական հասարակություն չպետք է տարբերել: Մեղավորները պետք է պատժվեն», – ասել է Զոհրաբյանը:
Ակցիայի մասնակից ՀՅԴ անդամ Բագրատ Եսայանն էլ ասել է, որ քանի որ «Հարսնաքարում» են եղել Ռուբեն Հայրապետյանի անձնական թիկնապահները, ուստի ինքն էլ այտեղ էր և, հետևաբար, պետք է հարցաքննվի քրեական գործի շրջանակներում: