Home / Հայաստան / Հայաստանը մի քանի մարդ է կառավարում. Զուրաբյանն անուններ է հնչեցրել, ասել է՝ ինչու է դեմ

Հայաստանը մի քանի մարդ է կառավարում. Զուրաբյանն անուններ է հնչեցրել, ասել է՝ ինչու է դեմ

Այսօր ԱԺ ՀԱԿ խմբակցության ղեկավար Լևոն Զուրաբյանը պարզաբանել է Հայ  Ազգային Կոնգրեսի  դիրքորոշումը կուտակային հիմնադրամների ստեղծման կառավարության ծրագրի վերաբերյալ:

Նա նշել է, որ Կոնգրեսում հասկանում են՝ որքան կարևոր նշանակություն ունի տնտեսության ակտիվացման համար կապիտալի շուկայի զարգացումը:

«Բնականաբար կարևորում ենք նաև այնպիսի ֆինանսական գործիքների ստեղծումը, որոնք նպաստում են երկրի տնտեսության մեջ երկար փողերի առաջացմանը: Այդ առումով մասնավոր կուտակային հիմնադրամների ստեղծումը, անկախ լիզենզավորված կառավարիչների ինստիտուտի  ներմուծումը, և խնայողությունների խրախուսումը պետության կողմից միանշանակորեն համապատասխանում են առաջատար երկրների փորձին, ինչպես նաև, որոշ պայմաններում կարող են հիմք դառնալ երկրի թռիչքային զարգացման համար, ինչպես դա, օրինակ, եղավ Չիլիում:

Մեր վերապահումները վերաբերում են բացարձակապես այլ խնդրին: Այս համակարգը ներմուծվելու է ոչ թե ինչ-որ վերացական մի տնտեսության մեջ, այլ այսօրվա Հայաստանում գործող շատ կոնկրետ, արատավոր և անառողջ տնտեսական և քաղաքական համակարգի մեջ», – ասել է Զուրաբյանը:

Նա հայտարարել է, որ Հայաստանն այսօր կառավարում են մի քանի մարդ, ովքեր կուտակել են իշխանությունը, սեփականություն, և կապիտալն իրենց ձեռքերում:

«Նրանք կենտրոնացրել են իրենց ձեռքերում ապօրինի մենաշնորհները, խեղդել են որևէ առողջ տնտեսական մրցակցություն, կառուցել են Հայաստանի գոյատեւման մի տնտեսական մոդել, որը պտտվում է մի քանի ներմուծող օլիգարխների շուրջ, ապահովելով նրանց գերշահույթները: Այսօրվա գործող քաղաքական և տնտեսական համակարգում, ի խախտումն Սահմանադրության, Հայաստանի կառավարիչները զբաղվում են ապօրինի արտոնությունների վրա հիմնված գործարարությամբ: Իշխանությունը և սեփականությունը դարձել են հավասարազոր հասկացություններ, բիզնեսը և սեփականությունը կենտրոնանում են մի քանի իշխանավորների ձեռքում:

Կուտակային հիմնադրամների ինստիտուտի ներմուծումը նման միջավայրում կլուծի միայն մեկ խնդիր. այն կբացի նոր հնարավորություններ Հայաստանի այսօրվա իշխանավորների հարստացման և ժողովրդի ունեզրկման համար: Կուտակային հիմնադրամների կառավարման բիզնեսի մեջ կմտնեն միայն այն մարդիկ, ովքեր 1/ունեն հսկայական ֆինանսական հնարավորություններ, և 2/ ովքեր հովանավորվում են Սերժ և Տիգրան Սարգսյանների կողմից: Մրցակցության բացակայությունը թույլ չի տա քաղաքացիներինն ընտրել իրենց միջոցների կառավարման համար ամենաարդյունավետ հիմնադրամային կառավարիչների, որովհետեւ այդպիսիք ուղղակի չեն կայանա այսօրվա մենաշնորհային միջավայրում: Եթե չլինի մրցակցություն, կուտակային ավանդներից առաջացած հիմնադրամները կկառավարվեն ծայր աստիճան անարդյունավետ, լավագույն դեպքում, կսպասարկեն ներմուծող օլիգարխիայի շահերը կամ, ինչը ավելի հավանական է, ուղղակի  կյուրացվեն հիմնադրամների կառավարիչների կողմից: Բնակչությունից վերցված հսկայական միջոցները այսպիսով կընկնեն Սերժ Սարգյսանի հովանավորությունը վայելող ֆինանսական երիտոլիգարխների, Միքայել Մինասյանի, Տիգրան Սարգսյանի, Արմեն Գևորգյանի և այլոց ձեռքը, և ամբողջ այս ծրագիրը կդառնա պարզապես ժողովրդին թալանելու և գործող ռեժիմը վերարտադրելու ևս մեկ միջոց:

Նման պայմաններում, հաշվի առնելով, որ ՀՆԱ մոտ 80 տոկոսը կազմում է սպառումը, կուտակային հիմնադրամների ստեղծման հետ կապված հարկերը ոչ թե կդառնան կապիտալի շուկայի, հետեւաբար, եւ տնտեսության զարգացման խթանիչ, այլ լրացուցիչ բեռ մեր առանց այդ էլ աղքատացած  ժողովրդի եւ սնանկացած մանր եւ միջին բիզնեսի համար: Արդյունքում լավ գաղափարները կվարկաբեկվեն եւ միայն կբարդացնեն ապագայում նման բարեփոխումների անցկացումը իսկական բարեփոխիչների կողմից:

Այս իշխանությունները սխալ տեղից են սկսում Հայաստանի տնտեսության բարեփոխումը: Նույն այս առաջարկած օրենքների ընդունումը կարող է դրական արդյունքներ տալ եւ խթաանել մեր տնտեսության զարգացումը, եթե նախեւառաջ քանդվի գործող մենաշնորհային համակարգը: Երբ Հայաստանում երաշխավորված լինի ազատ եւ արդար տնտեսական մրցակցությունը, այդ պայմաններում նոր հնարավոր կլինի ներդնել կուտակային հմինադրամների ստեղծման առաջարկված ծրագիրը», – ասել է Զուրաբյանը:

Նա ընդգծել է, որ Հայ Ազգային Կոնգրեսը դեմ է քվեարկելու օրինագծին, քանի որ համարում է, որ դրա ընդունմանը պետք է նախորդեն տնտեսության ապամենաշնորհեցման և բիզնեսը իշխանությունից տարանջատելու գոործընթացները: Տնտեսության զարգացման ապահովման այդ ուղղությունը Հայ Ազգային Կոնգրեսը համարում է առաջնային: