Epress.am Լուրեր Հայաստանից
Տաշիր քաղաքի բնակիչ՝ ազգությամբ եզդի 46-ամյա Սերգեյ Ախմեդովը 7 տարվա ազատազրկման է դատապարտվել կնոջը՝ Նատալյա Մովսիսյանին անզգուշությամբ կյանքից զրկելու համար:
Ինչպես գրում է «Առավոտը», ՀՀ վճռաբեկ դատարանը վերադարձրել է նրա փաստաբան Ալեքսանդր Ծատինյանի բողոքը` այդկերպ օրինական հողի վրա դնելով Լոռու մարզի առաջին ատյանի դատարանի կայացրած որոշումը:
Ըստ մեղադրական եզրակացության՝ Սերգեյ Ախմեդովն իր տան բակում կենցաղային հողի վրա առաջացած վիճաբանության ընթացքում մի քանի անգամ ձեռքով հարվածներ է հասցրել կնոջ դեմքին և գլխին՝ դիտավորությամբ պատճառելով վերջինիս առողջությանը ծանր վնաս: Արդյունքում՝ Նատալյա Մովսիսյանը դեպքից 12 օր անց ներգանգային հեմատոմայից մահացել է «Տաշիրի բժշկական կենտրոն»-ում:
«Առավոտը», անդրադառնալով այս դատաքննությանը, դատական նիստերից մեկի ժամանակ արձանագրել էր, որ հակառակ առաջադրված մեղադրանքին՝ Սերգեյ Ախմեդովը պնդել է, թե իր հասցրած ապտակը չէ կնոջ մահվան պատճառը. կինը տան աստիճաններից վայր է ընկել, ինքն էլ, ընտանեկան հանգամանքներից ելնելով, կարծել է, թե նա խուսափում է իրեն օգնելուց՝ այդ օրը մահացած մոր հանդերձանքը կարգի բերելու գործում, ուսերից բռնելով՝ մեկ անգամ հարվածել է կնոջը:
«Ուսերից բռնեցի ու ապտակեցի նրա քիթ-բերանին, էլ ոչ մի բան չեմ արել, աստիճաններից ընկնելուց է վնասվել»,- դատարանում բացատրել է Ախմեդովը՝ ափսոսանք հայտնելով կնոջ մահվան կապակցությամբ:
Նրա փաստաբան Ալեքսանդր Ծատինյանը «Առավոտի» հետ զրույցում նշել է, որ դատարանները անտեսել են այնպիսի հանգամանքներ, որոնք կարող էին հօգուտ Ախմեդովի դիտվել:
Նա պնդում է, որ Նատալյա Մովսիսյանի մահը վրա է հասել ոչ թե ամուսնու պատճառած վնասի հետևանքով, այլ տուժողի հետագա գործողություններն են մահվան պատճառ դարձել:
«Նա հրաժարվել է բուժում ստանալուց, բացի դրանից՝ բուժումը ստանալու ընթացքում օգտագործել է ալկոհոլի մեծ քանակություն: Բնականաբար, նման պայմաններում հնարավոր չէր, որ նա արդյունավետ բուժում ստանար: Այս հանգամանքին դատարանները ուշադրություն չեն դարձրել»,- բացատրել է Ծատինյանը:
Համաձայն փորձաքննության տվյալների՝ Նատալյա Մովսիսյանը «Տաշիրի բժշկական կենտրոն» ՓԲԸ ընդունվելու հաջորդ օրը ինքնակամ դուրս է գրվել, արդյունքում՝ բուժանձնակազմը զրկվել է բազմակողմանի հետազոտությունների և մահվան պատճառը պայմանավորող հիմնական մարմնական վնասվածքը՝ ներգանգային հեմատոման հայտնաբերելու հնարավորությունից:
«Տեսականորեն կարելի է նշել, որ եթե հիվանդ Մովսիսյանը ինքնակամ չհեռանար հիվանդանոցից, գտնվեր բժիշկների դինամիկ հսկողության տակ, հայտնաբերվեր հեմատոման, ապա չի բացառվում, որ ժամանակին կատարված վիրահատությամբ հնարավոր լիներ փրկելու նրա կյանքը»,- նշված է կատարված փորձաքննության հետևության բաժնում:
Լուսանկարը՝ «Առավոտ»-ի