Epress.am Լուրեր Հայաստանից
Ամենայն Հայոց Կաթողիկոսի մամուլի խոսնակ Վահրամ քահանա Մելիքյանը «բացարձակ անհեթեթություն է» որակել ամերիկահայ լրագրող, իրավապաշտպան Արա Մանուկյանի հոդվածը, որին երեկ անդրադարձել էր Epress.am-ը:
Հոդվածում Արա Մանուկյանը գրել էր, որ 1999 թվականին Ամենայն Հայոց Կաթողիկոսի ընտրության ժամանակ կաշառք է բաժանվել, իսկ ընտրված Գարեգին Բ-ի հետ զրույցում այդ խնդիրը բարձրաձայնել էր Մանուկյանի քեռին՝ Երուսաղեմի Հայոց պատրիարք Թորգոմ արքեպիսկոպոս Մանուկյանը:
Epress.am-ին հղած նամակում հնչեցնելով Մայր Աթոռ Սուրբ Էջմիածնի և Ամենայն Հայոց կաթողիկոսի պաշտոնական տեսակետը՝ Վահրամ քահանա Մելիքյանը նշում է, որ դա «ստորագույն քայլ է հոդվածագրի կողմից և անարգում հիշատակի Երուսաղեմի Հայոց պատրիարք Տ. Թորգոմ արքեպիսկոպոս Մանուկյանի»:
Epress.am-ը Վահրամ քահանա Մելիքյանից փորձել է ճշտել, թե արդյոք ընտրակեղծիքների շուրջ զրույց, այնուամենայնիվ, Թորգոմ պատրիարքի և Ամենայն Հայոց Կաթողիկոսի միջև եղել է: Ըստ մամուլի խոսնակի՝ նման զրույց չի եղել՝ «առավելաբար նման շինծու և երևակայական նյութի շուրջ»:
«Ամենայն Հայոց Կաթողիկոսի ընտրությունների կազմակերպման, անցկացման և քվեարկության մասին պատկերացում ունեցողները դժվար թե մտահոգություն ունենան ընտրակեղծիքների և քվերակության ընթացքի մասին»,- հավելել է Տեր Վահրամը:
Մեր հարցին, թե այդ դեպքում ինչ նպատակ ուներ Արա Մանուկյանը՝ նման խնդիր բարձրաձայնելով, Կաթողիկոսի մամուլի խոսնակն առաջարկել է այդ հարցով դիմել հոդվածի հեղինակին: