«Հարսնաքարի» մոտ բողոքել են երգիչների հարսանիքի դեմ. Գասպարիին ոստիկանություն են տարել (թարմացված)

Մի խումբ քաղաքացիական ակտիվիստներ հավաքվել են ՀՖՖ նախագահ, գործարար Ռուբեն Հայրապետյանին պատկանող ռեստորանային համալիրի մոտ: Նրանք դեմ են, որ երգիչներն ամուսնանան մի վայրում, որտեղ մեկ տարի առաջ ծեծի էր ենթարկվել և դրա հետևանքով մահացել էր Վահե Ավետյանը:

«Վահե Ավետյան» հասարակական շարժումն այսօր պիկետ է հրավիրել «Հարսնաքար» ռեստորանի մոտ՝ բողոքելով երգիչներ Մարտին Մկրտչյանի և Հռիփսիմե Հակոբյանի հարսանեկան արարողության դեմ:

Ինչպես Epress.am-ի հետ զրույցում պարզաբանել է Գարեգին Չուգազսյանը՝ որոշվել է հենց այս հարսանիքի օրը անցկացնել պիկետը, քանի որ այն առաջին հանրային հնչողություն ունեցող հանրսանիքն է՝ ռազմական բժիշկ Վահե Ավետյանի մահվանից հետո: Ավետյանը 2012-ի հունիսի 17-ին ծեծի էր ենթարկվել «Հարսնաքար» ռեստորանային համալիրում, իսկ 12 օր անց ստացված վնասվածքներից մահացել հիվանդանոցում:

Ըստ ակցիայի մասնակիցների՝ տվյալ հարսանեկան արարողությամբ փորձ է արվում մաքրել «Հարսնաքարի» անունը:

«Մենք զգոնության կոչ ենք անում: Այն տեղերում, որտեղ հանցագործություն է արվել և  հանցագործները չեն պատժվել, հնարավոր չէ երջանկություն կառուցել», – ասել է  Չուգասզյանը: Ակցիային մասնակցում էր մոտ 40 մարդ, հավաքվածները ձեռքներին ունեին «Վահե Ավետյանը ես եմ» գրառումով պաստառներ  և նկարներ, որի վրա գերեզմանաքարին գցված քող էր պատկերված:

Ոստիկանությունը, սակայն, թույլ չի տվել, որպեսզի ակցիան անցկացվի ռեստորանի դիմաց: Երևանի փոխոստիկանապետ Վալերի Օսիպյանն ասել է, որ ակցիայի նախաձեռնողները խախտում են այլոց՝            այդ դեպքում հարսանիքի մասնակիցների իրավունքները: Քանի որ ակցիայի մասնակցիները հրաժարվել են հեռանալ, ոստիկանույթունը ուժ է կիրառել և հրելով հեռացրել նրանց ռեստորանի մոտից: Ակիցիայի մասնակիցներից մեկը զանգել է Մարդու իրավունքների պաշտպանի գրասենյակի թեժ գծով և խնդրել է միջամտել:

Զանգահարողի խոսքով՝ քանի  դեռ իրենք հանրային ակցիա անելու իրավունքն են իրականցում, ոստիկանության գործողությունները պետք է ապօրինի համարել: 

 Ակտիվիստները ոստիկաններից կազմած պատնեշի մոտ՝ «Հարսնաքարի» դիմացի մայթին երկար են մնացել, սակայն Օսիպյանի գլխավորությամբ ուժերը նրանց այդպես էլ թույլ չեն տվել մոտենալ ռեստորանին: 

Ակտիվիստների մի մասը ակցիա է անցկացրել  «Հարսնաքարի» վերևի մուտքի մոտ: Այդ քաղաքացիներից մի քանիսը մոտեցել են բողոքողների հիմնական մասին և ասել, որ ակտիվիստ Վարդգես Գասպարին բերման է ենթարկվել ոստիկանների կողմից: Ատիվիստների խոսքով՝ Գասպարին պաստառով կանգնած է եղել, երբ նրան մոտեցել են ոստիկանները և քարշ տվել դեպի ոստիկանական մեքենա: Դրանից հետո նրան տեսնող չի եղել: Հետագայում Վալերի Օսիպյանը հաստատել է, որ Գասպարիին ոստիկանության բաժին են տեղափոխել բացատրություն տալու համար: Այլ մանրամասներ նա չի հայտնել: