Epress.am Լուրեր Հայաստանից
«Հայաստանի էլեկտրական ցանցեր» ՓԲԸ գլխավոր տնօրեն Եվգենի Բիբինը նախորդ շաբաթ օրը որոշում է կայացրել լուծարել խոշոր սպառողների դեպարտամենտը՝ 41 աշխատակիցների թողնելով գործազուրկ: Այս որոշման դեմ այսօր աշխատակիցները բողոքի ակցիա են կազմակերպել ընկերության կենտրոնական մասնաշենքի դիմաց՝ «Բիբին, հեռացիր», «Ոչ անարդարությանը», «Մեզ ազատում են առանց տնօրենների խորհրդի որոշման» և նման այլ գրառումներով պաստառներով:
Աշխատակիցներին որոշման մասին տեղեկացրել է դեպարտամենտի ղեկավար Ռաֆիկ Ասկարյանը: Վերջինս Epress.am-ին հայտնել է, որ այդ որոշումը կայացվել է առանց տնօրենների ժողով անցկացնելու՝ ուրբաթ օրը: Իսկ ավելի ուշ իրեն զանգել և աշխատանք են խոստացել՝ իր ընտրած 15 աշխատակիցների հետ, սակայն Ասկարյանը չի համաձայնվել՝ չցանկանալով դավաճանել անձնակազմին:
Այսօր ակցիայի մասնակիցների հետ փորձել է երկխոսել ինքը՝ Եվգենի Բիբինը: Իր որոշումը տնօրենը բացատրել է նրանով, որ դեպարտամենտի անհրաժեշտությունն այլևս չկա, և աշխատակիցներին կառաջարկվի աշխատանք արտադրական բաժիններում: Բիբինն առաջարկել է հարցը քննարկել երկու շաբաթից, սակայն բողոքի մասնակցիները պնդել են, որ դա փորձ է խուսափել աղմուկից մինչև ՌԴ նախագահ Վլադիմիր Պուտինի այցը Հայաստան: Աշխատակիցները խոստացել են շարունակել ակցիաները, միաժամանակ նրանք չեն դադարելու աշխատել:
Մանրամասները՝ տեսանյութում