«Շահերի բախում»․ Պատգամավորը պնդել է՝ ԱԺ նախագահը ձկնաբուծարաններ ունի

«Ժառանգություն» խմբակցության ղեկավար Զարուհի Փոստանջյանն այսօր Ազգային ժողովում խորհրդարանի նախագահ Հովիկ Աբրահամյանի անվան հետ կապված շահերի բախում է նկատել։ «Բնապահպանական և բնօգտագործման վճարների մասին» ՀՀ օրենքում փոփոխություններ կատարելու մասին» օրենքի նախագծի քննարկման ժամանակ Փոստանջյանն ասել է, որ օրենքը վերաբերում է ձկնարտադրության, իսկ որոշ ԱԺ անդամներ, այդ թվում՝ Հովիկ Աբրահամյանն այդ ոլորտում ձեռնարկատիրական գործունեություն են ծավալել:

Օրենքի նախագծով առաջարկվում է վերանայել բնօգտագործման վճարի հաշվարկման գործող կարգը. եթե ջրօգտագործման ամբողջ ծավալի փոխարեն բնօգտագործման վճարի հաշվարկման հիմքում դրված էր օգտագործված ջրի ծավալի միայն 5 %-ը, ապա այժմ օրենքի նախագծով Հայաստանի Հանրապետության Արարատի և Արմավիրի մարզերում բնօգտագործման վճարի հաշվարկման հիմքում դրվող խնդրո առարկա հաշվարկային ծավալը բարձրացվել և սահմանվել է արդյունահանված ստորերկրյա ջրերի պաշարի ընդհանուր ծավալի 50 %-ի չափով: Այսինքն՝ ձկնաբույծների վճարած գումարն ավելանալու է 10 անգամ:

Կառավարությունը նաև առաջարկում է ավելացնել տուգանքը խախտումների համար՝ այն սահմանելով 300 հազար դրամ:

Օրենքի վերաբերյալ իր ելույթում ՀՀԿ-ական պատգամավոր Արփինե Հովհաննիսյանն ընդունել է, որ ջուրը շատ կարևոր է, բայց պետք է մտածել՝ այն գինը, որ սահմանված է պահպանության համար, չափազանց բարձր չէ՞ արդյոք: Օրենքի վերաբերյալ իր մտահոգությունն է հայտնել նաև արտահերթ ելույթով հանդես եկած Հովիկ Աբրահամյանը, ով առաջարկել է «ավելի ընդգրկուն փաթեթ» ներկայացնել:

Անկախ պատգամավոր Էդմոն Մարուքյանն էլ ասել էր, որ տուգանքների չափը չի սահմանափակելու խախտումները, քանի որ 300 հազար դրամը մեծ գումար չէ խոշոր բիզնեսների համար: Ըստ Մարուքյանի՝ օրենքը միայն կարող է ոլորտը տանել խոշորացման:

Զարուհի Փոստանջյանը խնդրի կապակցությամբ հայտարարել է. «Մենք տեսնում ենք շահերի բախում ԱԺ-ում: Այս դահլիճում կան մարդիկ, ովքեր ունեն լճեր և ձկնարտադրությամբ են զբաղվում, օրինակ, Հովիկ Աբրահամյանը: Այդ սանկցիաներով չեն վերանա խախտումները, ես չեմ հավատում: Նրան և նման խոշոր արտադրողներին 300 հազար դրամ տուգանքը չի վնասի, այն ընդամենը մրցակցությունից դուրս կթողնի մանրներին»:

Հակադարձելով՝ Հովիկ Աբրահամյանն ասել է, որ այս ելույթից հետո իր համար պարզ է դառնում՝ ով է իր դեմ հրապարակումներ պատվիրում մամուլում:

«Փոքր երկիր է, մենք գիտենք, թե մամուլին ով է պատվերներ տալիս։ Իմ մասին հրապարակումներ եղան, թե ես ունեմ ձկների արտադրության բիզնես: Հիմա պարզ է՝ ով է այդ հոդվածների պատվիրատուն: Նման բան անելը հարիր չէ պատգամավորին։ ԶԼՄ-ներում պատվերներ տալու փոխարեն զբաղվեք բարեգործությամբ։ Ես ըմբռնումով եմ մոտենում ձեր մաղձին, բայց ինչքան է այն շարունակվելո՞ւ», – ասել է Հովիկ Աբրահամյանը։

«Այդ մասին հարցրեք Սերժ Սարգսյանին», – պատասխանել է Զարուհի Փոստանջյանը։ Վերջինս փորձել է շարունակել խոսքը, սակայն պատգամավորի խոսափողն անջատել են։