Home / Հայաստան / Գոյություն չունեցող մեքենաների սեփականատերերին մինչև տարվա վերջ ժամանակ են տվել

Գոյություն չունեցող մեքենաների սեփականատերերին մինչև տարվա վերջ ժամանակ են տվել

Այն անձինք, ովքեր առանց համապատասխան փաստաթղթերի օտարել են իրենց տրանսպորտային միջոցը կամ ունեն իրենց անվամբ հաշվառված, բայց փաստացի գոյություն չունեցող տրանսպորտային միջոց, հնարավորություն կունենան մինչև ընթացիկ տարվա դեկտեմբերի 31-ը կատարել համապատասխան գործողություններ՝ տրանսպորտային միջոցի օտարումը պատշաճ ձևակերպելու կամ գոյություն չունեցող տրանսպորտային միջոցը խոտանելու համար։ Այս մասին հայտնում է ՀՀ ոստիկանությունը։

Ոստիկանության հաղորդագրության մեջ, մասնավորապես, ասված է․

«ԱՊՊԱ պայմանագիր չունենալու համար սահմանված 5.000 դրամ վարչական տուգանք նախատեսող պատասխանատվության կիրառումից հետո ի հայտ եկած խնդիրները լուծելու նպատակով ընդունված՝ ՀՀ կառավարության 2014 թ. մարտի 27-ի «Վարչական պատասխանատվություն չկիրառելու մասին» N 383-Ա որոշմամբ սահմանվել է, որ այն տրանսպորտային միջոցի (միջոցների), որոնց համար ավտոտրանսպորտային միջոցների օգտագործումից բխող պատասխանատվության պարտադիր ապահովագրության պայմանագիր երբևէ չի կնքվել ու այդ տրանսպորտային միջոցով կատարված Վարչական իրավախախտումների վերաբերյալ Հայաստանի Հանրապետության օրենսգրքի 129.2-րդ հոդվածի առաջին մասով նախատեսված իրավախախտումից բացի որևէ այլ իրավախախտման դեպք 2011 թ. հունվարի 1-ից հետո չի արձանագրվել, այդ ավտոտրանսպորտային միջոցի (միջոցների) սեփականատիրոջ (սեփականատերերի) (վարձակալ, ֆինանսական վարձակալության (լիզինգի) պայմանագրով իրեն տրամադրված) նկատմամբ Վարչական իրավախախտումների վերաբերյալ ՀՀ օրենսգրքի 129.2-րդ հոդվածի առաջին մասով նախատեսված պատասխանատվության կիրառումից, ինչպես նաև արդեն իսկ կայացված վարչական ակտերով նշանակված տուգանքների գանձման ուղղությամբ միջոցների ձեռնարկումից ՀՀ ոստիկանությունը ձեռնպահ կմնա մինչև 2014 թ. դեկտեմբերի 31-ը:

Վերը նշված տրանսպորտային միջոցների համարանիշերի ցանկը տեղադրված է Հայաստանի Հանրապետության ոստիկանության պաշտոնական կայքում՝ «ԱՊՊԱ» անվանումով պատուհանում»: