Epress.am Լուրեր Հայաստանից
Էլեկտրաէներգիայի սակագնի բարձրացման դեմ Բաղրամյան պողոտայի նստացույցին մասնակցած բազմաթիվ մարդկանց վերջին շաբաթվա ընթացքում այցելում են քաղաքացիական հագուստով անձիք՝ երբեմն չներկայանալով, իսկ հիմնականում ներկայանելով որպես համայնքի նոր օպեր-լիազորներ:
Նրանք չեն հիմնավորում՝ ինչու են հենց այդ քաղաքացիներին այցելել․ մի քանի դեպքերում օպեր֊լիազորները պատճառաբանել են, որ հարցեր ունեն բակում տեղի ունեցած ինչ-որ վիճաբանության մասին:
Բաղրամյանի նստացույցին մասնակցած Անտոն Իվչենկոն Epress.am-ի հետ զրույցում պատմել է, որ քաղաքացիական անձիք այցելել են իր ծնողների բնակարան, և, քանի որ տանը ոչ ոք չի եղել, իր մասին հարցուփորձ են արել հարևաններից:
«Ասել են՝ Անտոնն այստե՞ղ է ապրում․ ինձ նկարագրել են որպես մորուքով, ականջողով տղա (նկարագրությունը չի համապատասխանում Իվչենկոյի կերպարին ֊ խմբ․): Հարևաններից սկսել են հարցնել մայրիկիցս, քանի տարեկան է, որտեղ է աշխատում: Ներկայացել են որպես «նոր օպեր-լիազորներ» և խոստացել են նորից գալ, սակայն մինչ հիմա չեն եկել»,- պատմել է Իվչենկոն:
Lragir.am-ի լրագրող Թեհմինե Ենոքյանը ևս նման դեպքեր է նկարագրել: Ենոքյանի հետ զրույցում Մուրադ Վարձելյանը պատմել է, որ իր տուն են այցելել քրեականի օպեր֊լիազորներ, հարցուփորձ են արել եղբորից:
Օպեր-լիազորները պատճառաբանել են, որ նախորդ օրը բակում կռիվ է եղել և դրա հետ կապված են հարցուփորձ անելու: «Դրանից մի քանի ժամ հետո եկել է թաղայինի տեղակալը և հարցուփորձ է արել՝ ընդհանրապես քանի անդամներ կան տանը, ես ինչով եմ զբաղվում: Չեն կոնկրետացրել՝ ինչի են հարցնում»,- ասել է Վարձելյանը:
Միհր Ավագյանն էլ պատմել է, որ իրենց տուն են այցելել քաղաքացիական հագուստով անձիք և առանց ներկայանալու պահանջել են բնակարանում ապրողների անձնագրերը, հետո պահանջել է տան անդամների բջջային հեռախոսի համարները:
Լուսանկարում՝ հունիսի 23-ին ոստիկանությունը ցրում է նստացույցի մասնակիցներին