Երևանի կենդանաբանական այգու կենդանիների գլխաքանակը տարեցտարի նվազում է։ Պաշտոնական աղբյուրներից «Ժողովուրդ»-ին հայտնի է դարձել, որ միայն վերջին երկու տարիների ընթացքում ավելի շատ կենդանիներ են սատկել, քան նախորդ տարիներին։ 2010 թվականի վերջին կենդանաբանական այգին ունեցել է 256 տեսակի կենդանի և թռչուն, իսկ կենդանիների և թռչունների գլխաքանակը կազմել է 2807։
Անցած տարեվերջի դրությամբ՝ Երևանի կենդանաբանական այգում առկա է եղել 149 տեսակի կենդանի, որոնց գլխաքանակը կազմել է 854։
Թերթն ընդգծում է, որ կենդանիների գլխաքանակը սկսել է նվազել այն բանից հետո, երբ 2011 թվականին տնօրեն է դարձել Ռուբեն Խաչատրյանը։ Լուրեր են շրջանառվում, որ այգում պարբերաբար կենդանիների ապօրինի վաճառք է իրականացվում, ինչն էլ թաքցնելու համար այգու աշխատակիցները ու ղեկավարությունը հայտարարում են, թե կենդանիները սատկել են։
Լուսանկարը՝ Armenianow.com-ի։
«Ժողովուրդ»-ը դեպքի հետ կապված հարցում էր ուղարկել կենդանաբանական այգու տնօրենին, սակայն վերջինս չի պատասխանել։
Թերթը հիշեցնում է, որ դեռևս 2010 թվականին այգու աշխատակիցները նամակ էին հրապարակել, որտեղ, ի թիվս այլ բացահայտումների, ներկայացրել էին, որ 2011 թվականին տնօրենի կարգադրությամբ, առանց մասնագիտական հետազոտության, երկու սևաթույր կարապ (յուրաքանչյուրի գինը կազմում է 2 հազար 500 դոլար) վարձակալության էին տրվել «Օպելլա» ՍՊԸ-ին և «գործուղվել» Դիլիջան՝ Պարզ լիճում մոտորանավակ վարողներին էսթետիկական հաճույք պարգևելու նպատակով։ Որոշ ժամանակ անց կարապները սատկել էին։
Ըստ հանրապետական անասնաբուժական, հակահամաճարակային և ախտորոշիչ կենտրոնի կողմից տրված եզրակացության՝ կարապների սատկելու պատճառը եղել է սթրեսը, որը առաջացել է մոտորանավակաների հուժկու ձայների արդյունքում։