Հայաստանցիներն արդեն որերորդ տարին ապրում են «Արջամկան օրը» ֆիլմի հերոսի կարգավիճակում, երբ, ինչպես ֆիլմի հերոսը չէր կարողնաում նոր օր սկսել, այնպես էլ Հայաստանում քաղաքական գարուն չի գալիս: Այս մասին լրագրողների հետ հանդիպման ժամանակ հայտարարել է կինոռեժիսոր, «Սարդարապատ» շարժման նախաձեռնող խմբի անդամ Տիգրան Խզմալյանը:
«Մենք մնացել ենք քաղաքական ձմռան մեջ, մարտի 1-ի` լույս գիշերվա մեջ, մարտի 2-ը և քաղաքական գարունը մեզանում չի սկսվում ոչ մի կերպ»,- ասել է նա:
Խոսելով Հայաստանում արաբական ձևով հեղափոխությունների հնարավորությունների մասին` Խզմալյանն ասել է, որ հեղափոխությունը չի գալիս, հեղափոխությունն անում են:
«Հեղափոխությունը անձրև չէ, այն չի գալիս, հեղափոխությունն անում են: Մինչև մենք բոլորս չհասկանանք այս պարզ ճշմարտությունը, ոչինչ չի փոխվի: Մեզանից է կախված` ինչ ենք մենք անելու»,- ասել է Խզմալյանը:
Նա հայտարարել է, որ «Սարդարապատը» չի պատրաստվում մասնակցել ոչ արտահերթ, ոչ էլ հերթական ընտրություններին:
«Մենք ամիսներ շարունակ պնդում ենք, որ բռնապետությունները իշխանության գալիս են ոչ ընտրություններով, և բնականաբար ընտրություններով չէ, որ վտարվում են իշխանությունից: Ընտրություններին մասնակցելու կանչող, կոչ անող քաղաքական ուժերը կամ միամիտ են, կամ մեղսակից են այն հանցանքին, որը կկատարվի, եթե հայ ժողովրդին այս պայմաններում կանչեն ընտրությունների»,- մանրամասնել է բանախոսը:
Նա ընտրություններն անվանել է մատնոցախաղ, և դրանց մասնակցելը համարել անիմաստ: Խզմալյանի խոսքով` երկրի ու երեխաների ապագան այդ մատնոցախաղով որոշելը հանցագործություն է:
«Բնականաբար, մենք չենք մասնակցելու ընտրություններին, իսկ բանաձևը շատ պարզ է` ոչ թե ընտրություններով պետք է հայ ժողովուրդը հասնի իշխանափոխության, այլ հակառակը` իշխանափոխության միջոցով հասնի ընտրություններին»: