Այս տարվա հուլիսին նորվեգական Ուտոյա կղզում Անդերս Բերինգ Բրեյվիկի կողմից իրականացված ահաբեկչության հետևանքով զոհվածների հարազատները դիմել են ոստիկանություն` պահանջելով ստիպել այդ դեպքերի մասին պատմող ֆիլմի հեղինակներին ջնջել կինոնկարի թրեյլերը համացանցից:
Նորվեգական VG կայքի տեղեկություններով` զոհերի հարազատները հոգեկան ցավ են ապրում այն դիտելուց, այդ իսկ պատճառով նման խնդրանքով դիմել են ֆիլմի հեղինակներին: Կինոնկարի պատրաստման աշխատանքները դեռևս շարունակվում են ԱՄՆ-ում:
Ֆիլմը ստացել է «Ուտոյա կղզին» անվանումը: YouTube կայքում տեղադրված Ֆիլմի թրեյլերում ներկայացվում են կղզում տեղի ունեցած որոշ իրադարձություններ:
Զոհերի հարազատների շահերը ներկայացնող փաստաբանը հայտարարել է, որ այս ֆիլմը բոլորովին տեղին չէ:
Ֆիլմի գործադիր պրոդյուսեր Ջորջ Անթոնի խոսքով` ֆիլմի ստեղծման պատճառներից մեկը զենք կրելու վերահսկողությունը խստացնելու և համապատասխան ավելի խստ օրենքներ ընդունելու կոչ անելն է: